Ilisimannittut video atorlugu apersorneqartut
Video aamma allanut atorneqarsinnaassaaq soorlu eqqartuussinerni ilisimannittunik apersuinernut.
Tamannarpiarlu qanittukkut atorneqareerpoq, tassa Nunatsinni eqqartuussinermi, Sjællandimi ilisimannittut marluk videokkut toqqaannartumik apersorneqarlutik nalunaajaatinneqarmata. Næstvedip eqqartuussiviani eqqartuussisuuneq, Alex Elisiussen DR-imut taama oqaluttuarpoq.
- Kalaallit Nunaanni eqqaartuussinermi, ullut marlussuit matuma siorna pisumi, ilisimannittutut nassuiaatinneqartut inuit marluk, Næstvedip eqqartuussivianut aggersarneqarput, tassanngaanniillu video atorlugu apersorneqarput nalunaajaasinneqarlutillu.
- Tamannalu ajoriinnagassaanngilaq tassami piffissarujussuarmik atuinissaraluit pinngitsoortinneqarpoq aamma ilisimannittut piffissaat taamaalilluni annikinneq atorneqarluni, tassami Kalaallit Nunaanukanngikkaluarlutik taakku videokkut apersuinnarneqarmata nassuiaasinneqarlutillu. Næstvedimi eqqartuussisuuneq, Alex Ellisiussen DR-imut oqarpoq.
Video atorlugu eqqartuussinermi ilisimannittunik sassartitsisarnerit, politiit suliassaannik annertuumik annikillisaataassasoq, Eqqartuussiviit Danmarkimi Aqutsisoqarfiani pisortaq, Inge de Neergaard oqarpoq taamatullu eqqartuunneqartussat isertitsivinniisinneqaannarlutik apersorneqartalernissaanni taakku qimaasarnissaat pinngitsoortinneqarsinnaasoq oqaatigalugu.
