Birna pillugu suliaq Ilisimannittut: Unnerluutigineqartoq annilaangarpasippoq
Kilisaammi Polar Nanumi, Polar Seafoodimit pigineqartumi, inuttat arfineq marluk ilisimannittutut ullumi nassuiaateqartinneqartussaapput.
Maannalu ilisimannittut siulliit pingasut nassuiaatinneqareersut unnerluutigineqartoq Islandip politiivinit tigusarineqannginnermini annilaangasimasoq nutaarsiassaqartitsivik mbl.is allaaserisaqarpoq.
Angut unnerluutigineqartoq allarummik nassarluni januaarip 14-ani ullaap tungaani kilisaammukarsimavoq. Inuttallu takunnittut isumaqaannarsimapput biilimi meriartoqarsimammat allarummik tigummiartoq, mbl.is allappoq.
Angut 30-inik ukiulik kilisaammiillereerluni tusagassiortumit Islandimiumit sms-erfigineqarsimavoq. Biilit aappaluttut, unnerluutigineqartup attartorsimasai, pillugit tusagassiortoq paasiniaalluni allassimavoq. Allagarsiani inuttaqatiminut umiarsuullu naalagaanut takutissimavaa.
Angut 30-inik ukiulik kingorna eqqissiviillisimavoq, ima eqqissiviitsigilersimatigaluni allaat eqqissisaammik nakorsaaserneqartariaqarluni.
Kilisaat Islandimut utilermat, Islandimiullu politiivi kilisaammut pimmata unnerluutigineqartup igasumut oqaatigisimavaa politiinit nammineq aaneqarnerluni eqqarsaatersuutigalugu.
AAMMA ATUARUK Kilisaammi inuttat ilisimannittutut nassuiaateqariartortut