Ilisimannittut oqaluttuartinneqarput
Politiit ikiaroornartumik eqqussuisimasunut eqqartuussinersuarmi pingaarnertut ilisimannittutut Nuummi eqqartuussivimmi atugaat ulloqeqqata siorna apersorneqarpoq.
Angutit pingasut ikiaroornartumik Kalaallit Nunaannut eqqussuisimasutut unnerluutigineqarput – politiiusimasut marluk pisumi akuummata pisoq soqutiginaqaaq.
Pingaarnertut ilisimannittoq arnaavoq inuusuttoq, Ilulissani ikiaroornartuerniartarsimasoq.
Oline Inuusuttoq Olsen Nuummi eqqartuussivimmi ullaap tungaa malinnaasoq ima oqaluttuarpoq:
- Arnaq 21-inik ukioqarpoq unnerluussisup pingaarnertut ilisimannittutut inissisimatippaa. Taassuma eqqartuunneqarnermini oqaatigisimasai angutit pingasut eqqartuunneqarneranni tunngavilersuutitut maannakkut atorneqarput. Arnaq isiginnaarutikkut toqqaannartumik apersorneqalersinnani oqaaseqarusunnani nalunaaruteqarpoq. Unnerluussisup apeqqutissai oqaaseqaataalu oqaaseqarfigerusunnagit aamma ilisimatitsivoq. Tamannalu pillaatisissutigissaguniuk aamma piareeqqalluni ilisimatitsivoq. Kammalaatini asasanilu ajortisarusunnginnamigit taamatut oqaaseqarusussimanngilaq.
Arnaq tigusarineqaqqaarami apersorneqarlunilu oqaatigisimasani atorsinnaannginnerarpai – taamanikkummi ullut 14-t ingerlanerani 50 gramit missaani ikiaroorsimanermi kingunerisaanik naliginnaq oqalussimanissi ilimagigamiuk. Taamaattumik oqaaserisimasami tatiginassusaat arnap taassuma nammineq apeqquserpai. Taamaalilluni unnerluussisup pingaarnertut ilisimannittuutitsinera apeqquserujussuarlugu.
Arnaq alla Danmarkimi najugalik ilisimannittutut aamma apersorneqarpoq. Arnaq taanna angutit pingasut eqqartuunneqartut ilaata nuliakoraa. Angut taanna ikiaroornartumik Ilulissanut eqqussuisuusimavoq. Arnap taassuma apersorneqarnerata nalaani malunnarpoq uigisimasaa assut misigissutsimigut attorteqqasoq aliasuttorlu. Arnaq taanna Danmarkimut ikiaroornartumik pisiniartartunngornermi nalaani artorsangaatsiarsimasoq oqaluttuarnerani paasinarsivoq. Arnap taassuma apersorneqarnera naammassimmat misigissutsikkut attortissimanerat takuneqarsinnaavoq.
Niviarsiaraq Ilulissani najugalik 17-inik ukiulik anaanami saniani issialluni aamma apersorneqarpoq. Niviarsiaraq taanna ikiaroornartumik aningaasanillu Ilulissaniit Qeqertarsuarmukaassisimalluni nassuerpoq.
