Ilisimaneqarsimappat angallavigeqquneqarsimassanngikaluartoq
Sisimiuni Nalunnguarfimmi sapaatip-akunnerata naanerani sikukkut nakkartoqarmat qimmeq qimuttoq ataaseq ipivoq.
Taamatut pisoqarnissaa kialuunniit sillimaffigisimanngilaa, ukiummi taamaalinerani taseq qerraarilluartarmat, Sisimiut kommuneat, politiit Nukissiorfiillu naliliipput.
Sisimiut kommuneani teknikkikkut pisortap Mads Borgip oqaatigaa ilisimasimasuugunikku taseq tamaat angallavigeqqujunnaarsimassagaluarlugu:
-Ukiut tamakkiallugit taama pisoqartartoq ilisimaneqarpoq. Imeq Nilliasumiit Nalunnguarfimmut kuutsinneqartarpoq, pingaartumillu issangiartillugu tamanna sillimaffigisarparput. Pisorli sungiusimasatsitut pisimanngilaq.
Nilliasumiit Nalunnguarfimmut kussiarput ajorsimanngilaq. Arfininngormat sapaatiummallu kussiorpugut, ilimagalutigu ajussanngitsoq.
Arajutsisimavarpulli kussiukkat ilaasa apummik milinneqarsimanerat, aatsaallu sapaatiummat ullaap tungaani paaseriaratsigu Nalunnguarfiup sikuatigoorneq tamaat unitsipparput, Sisimiut Kommuneani teknikkut aqutsisoqarfiup pisortaa Mads Borg nassuiaavoq.
Oqummiannguup Tasianiit erngup aasaru kuuffiliotoqarnissaanik Sisimiut kommuneat Nukissiorfiillu maanna pilersaaruteqarput, sapaatip-akunnerata naanerani pisutulli pisoqaqqinnginniassammat.
