Ilisarnaatit paasiuminaatsinneqarput
Igaffimmi atortut assigiinngitsut innaallagiatorpallaanngitsut atuisartut amerlanersaasa qinertarpaat. Soorlu nillataartitsiviit/qerititsiviit A+-imik imaluunniit A++-imik nalunaaqutsersimasut pisiarerusunnerusarlugit.
Tamakkuninngali sanaartortartut nalunaaqutsersuisarnerat ajornartorsiutitaqarpoq. Danmarkip Radioata nittartagaani tamanna atuarneqarsinnaavoq.
Elsparefondip misissuisitsinerani erserpoq, qerititsivinni/nillataartitsivinni qulini misissukkani sisamat nalunaaqutserneqarnerini allassimasumit sarfamik atuinerusartut.
- Atuisut nalorninartorsiulertarput, sarfamillu atuinikinnerusumik pisinerlutik naatsorsuutigisinnaanngilaat, aamma A+-imik nalunaaqutalimmik pisigaluarunik. Elsparefondimeersoq Mads Lindvall Kristiansen oqarpoq.
Nillataartitsiviit/qerititsiviit AEG-mik, Candymik, Elektroluximik Gramimillu ilisarnaatillit taamungaannaq misiliinermi nalunaaqutsernerlutaapput.