Ilisarititsinermi partiit assigiiaarpallaarsorineqarput
Ilisarititsinermi saqqummeeriaatsit assigiinngitsut atorneqartut Sten Lundip maluginiarpaa, partiilli qineqqusaarutaat assigiiaakannersutut nalilerlugit. Sten Lund aperaarput partiit immikkoorutitik ersersinniarlugit qanoq iliorsimasinnaagaluarnersut.
- Nunatta kusanassusaa pivallaarneqalaarpoq. Sammisanut tunngatillugu assit atorneqartut oqariartuutiginiarneqartullu naapertuunnerunissaat ujartorpara, isigisaq tusaasarlu ataqatigiinnerullutik, Sten Lund oqarpoq, nangipporlu:
- Partiit politikkimik saqqummiussineranni innuttaasut ilikkagaqarsimassasut neriuutigaara, partiit saqqummiussinerminni atuffasserpalaarpallaartutut saqqummiussigaluartut, politikkikkut naliliisartoq Sten Lund oqarpoq. Sten Lund Tele Greenlandimi sulisunik aallussivimmi aqutsisutut atorfeqarpoq.
