Ilisarisimasaq ICC Kalaallit Nunaanni siulittaasunngoqqittoq
ICC Kalaallit Nunaat maajip ulluisa 27-anni qinersisoqarneratigut siulittaasortaarpoq.
Hjalmar Dahl siulittaasutut qinigaavoq, Kuupik Kleistilu siulittaasutut ukioq manna siusinnerusukkut tunuartoq taarserlugu.
Hjalmar Dahl taamaasilluni Kalaallit Nunaat sinnerlugu ICC-mi tamakkiisumik siulittaasup tulliatut inissippoq.
- Naggueqatigiit Inuit suleqatigiinnerannik tapersersuivunga. Piffissami matumani pissanganartumi ulapiffioqisumilu, pingaartumik ICC-mi siulitaasuutitaqarnitta nalaani tapersersuisuullunga suleqataanissara qilanaaraara, Hjalmar Dahl, tusagassiorfinnut nalunaarummi ilaatigut oqarpoq.
Hjalmar Dahl ICC-mi ilisimaneqarluarpoq, taannami ICC Kalaallit Nunaanni 2018-imit 2022-p tungaanut siulittaasuuvoq.
Inuit Issittormiut Kattuffiat tassaavoq nunap inoqqaavisa kattuffiat, Naalagaaffiit Peqatigiinnit akuerisaq, Inuillu Issittoq tamakkerlugu 180.000-it mississaannik amerlassusillit sinniisoqarfiat. Kattuffik sisamanik immikkoortoqarfeqarpoq tassaasut; ICC Kalaallit Nunaat, ICC Canada, ICC Alaska aamma ICC Chukotka.
Kalaallit Nunaat ICC-mi maanna siulittaasuutitaqarpoq. Sara Olsvig ICC-mi tamarmi siulittaasutut 2022-mi qinigaavoq, Kalaallit Nunaallu ICC-mi tamakkiisumik 2026-p tungaanut siulittaasuussalluni.
