Sermersooq: Ilisarisimanngisat mianersorfigineqarnissaannik meeqqat oqaloqatigikkit

Meeqqat ilisimasarinngisaminnut mianersortarnissaannik angajoqqaat kaammattuisarnissaat Kommuneqarfik Sermersuumit inassutigineqarpoq.
Assi © : Kommuneqarfik Sermersooq
apriilip 24-at 2017 07:20

Atuarfimmi Ukaliusami atuartut sisamat angutinit marlunnit akilerneqarlutik biilinut ikeqquneqarnerisa kingorna, angajoqqaat meeqqatik ilisarisimanngisaminnit usserniarneqartillutik naameertarnissaannik oqaloqatigissagaat Kommuneqarfik Sermersuup angajoqqaanut inassutigaa.

Meeqqat atuartut katillugit sisamat angutinit marlunnit meeqqat aningaasanik akilerlugit atuarfiup Ukaliusap biilinut uninngaartarfianni uanneqariaraluarput.

Atuarfeqarnermut pisortaq: Eqqaasitsissutigiuarnissaa pisariaqarpoq

- Ukaliusami pisoq ilungersunartutut isigaarput, Kommuneqarfik Sermersuumi atuarfeqarnermut immikkoortortaqarfimmi qullersaq, Jesper Madsen oqarpoq, nangillunilu:

- Ukaliusami meeqqat katersuutsinneqarneranni pisoq oqaloqatigiissutigineqarlunilu meeqqat apeqqutaat ilinniartitsisunit akineqartarput. Meeqqallu pisumut assigusumik naammattoorsissagaluarpata ilisarisimanngisaminnut naameertarnissaat ilinniartitsisunit kaammattuutigineqarpoq, Jesper Madsen tusagassiuutinut nalunnarummi oqarpoq.

Pisoq tujorminartoq pillugu qanorlu iliuuseqartoqarsinnaanera pillugu atuarfiup pisortaata Nuummi politiit akuttunngitsunik attaveqarfigisarpai.