Ilinniarusuttut akimmisaarneqarput
Siiliki puisillu amii ilisserlugit atisaliarinissaannut ilinniarnermi sungiusarfittut suliffik ilinniarnermusiaqartitsisinnaanngippat qanoriliortoqartarpa? Apeqqut taanna kalaallit marluk atisanik ilisserisartutut ilinniarnerlutik eqqarsaateqartut maanna apeqqutigaat. Namminersornerullutik Oqartussat nalunaarusiaanni, sungiusarfissap ilinniarnermusiaqartitsinissaannik piumasaqaatip, taakkku ilinniarnissaraluat akimmisaartippaa.
- Mikisuuninniit nalunngilara designerinngorusullunga, 20-inik ukiulik Sisimiuneersoq Kristian Johansen – Titsiaammik taagorneqartoq taama oqarpoq.
Atisanik ilisserisartunngorusunnini pissutigalugu siorna Tasiilaliarpoq ammerivimmi sungiusarluni suliniassagami. Puisip amii atorlugit aaqqasiorneq isersimmasiornerlu tassani ilinniarpai:
- Ilikkakkakka taakani naammagivakka. Ilisserisartut ilinniarfianni ilikkakkakka naapertorlugit ilinniarnera suli naammassinngilara. Ilikkagaqarpunga naammanngillalli, Titsiaat taama oqarpoq.
Tamanna tunngavigalugu Danmarkimi kalaallip atisanik ilisserisarfiutillip, Else Lennertip ilisserisarfiani, ilinniarnissi Titsiaap pingaarnerutippaa. Titsiaat ilinniartutut tikilliaqqusaavoq – ilinniarnermusiaqarsinnaanngilarli:
- Inuusuttut ilisserisartutut atisaliortartutullu ilinniarusuttut ilinniartikkusukkaluaqaakka, taamaattorli massakkut akiligassanik ulikkaarama ilinniartoqarsinnaanngilanga, Else Lennert taama oqarpoq.
Ilinniartoq alla aggustip qaammataani taassuma aamma suliunnaarsittariaqarsimavaa.
42-inik ukiulik Sisimiuneersoq Inger Anderson Danmarkiliarpoq Else Lennertip ilisserisarfiani sungiusaatigalugu suliartorluni. Tappavungalu tikittoq Sisimiut Kommuneata allaffissornikkut kukkusoqarsimasoq paasivaa – sungiusaatigalugumi suliffigineqartussaq ilinniarnermusiaqartitsisinnaanngilaq. Tamatuma kingorna Inger Andersonip ilinniarnini taamaatippaa. Taamatut ilisimatinneqarneq nuannersuunngilaq:
- Nuanniitsorujussuuvoq. Danmarkimummi aallarpunga ilinniariartorlunga. Ukiut sisamat qaammatillu arfinillit ilinniarnera naammassiniassagukku maaniinnissara ilisimalereerpara. Ilinniarnilli unitsitaangama ajuallappunga. Tikereersungalu kalerrippaannga angerlamut bilitsimik tuniinnarsinnaallunga, allamillu ikiorsernanga, Inger Anderson ilinniarnerminik Danmarkimi nangitseqqissinnanini neriuutigalugu nunatsinnut angerlarusunngikkallartoq taama oqarpoq.
Danmarkimi suliffeqarfinni ilinniartut tapiiffiginissaannut Namminersornerullutik Oqartussat periarfissaqanngitsut, Namminersornerullutik Oqartussat Inuussutissarsiutigalugu ilinniartitaanermut pisortaqarfiani siunnersorti Naja Lyberth ilisimatitsivoq. Else Lennertip ilinniartoqarnermini danskit inatsisai malillugit tapiiffigitissinnaanerminik ujartueqqullugu Naja Lyberthimit kajungimissaarneqarpoq.
