Ilinniarunnaartartut ilitsersuisut atorlugit ikilisarniarpaat
Kalaallit ilinniagaqartut arlallit Aarhusip Universitetiani aallartipput ilinniartut nutaat 8.000-it aallarteqatigalugit. Nunatsinni GU-miit Universitetimut 35. - 40.000-nik ilinniartulimmut nuunneq ilinniartut ilaannut sakkortusinnaavoq. Taamaammat Aarhusimi Kalaallit Illuutaat ilitsersuisoqarnermik misiliinialerpoq, ilinniartut nutaat pitsaanerpaamik aallartinnissaat qulakkeerniarlugu.
- Ilinniartut misilittagartunerit 25-it ilinniarfinni ilisimasortatut atuuttussat isumaqatigiissusiorfigaavut taakkulu ilinniartut nutaat aallartinneranni ikiussavaat, Aarhusimi Kalaallit Illuutaanni pisortaq Sven Kolte KNR-mut oqarpoq.
Ilitsersuisoqarnermi aaqqissuussineq Aarhusimi Kalaallit Illuutaanni siullermeerutaasumik misilinneqalerpoq taannalu novemberip naaneranut ingerlassaaq.
- Ilinniartut ilaannut sakkortusinnaavoq Aarhus Universitetimi ilinniartut 35. - 40.000-it akornannut pineq sakkortusinnaavoq. Ilitsersuisunngortut ilinniarfinniissapput tassanilu suleriaatsinut ilinniartut nutaat iserniarneranni ikiussavaat, Sven Kolte oqarpoq.
Kalaallit Danmarkimi ilinniagaqartut ilinniakkaminnik taamaatitsiinnartartut amerlapput. Inuiaqatigiinnullu akisoorujussuuvoq ilinnialeraluarluni angerlaannartoqartarnera.
- Arlaqarput ilinnialernermi ukiup siulliup ingerlanerani taamaatiinnartartut. Ilinniarfimmi aallartinnerliorneq pissutaaqataasinnaavoq ilinniakkamik taamaatitsiinnarnermut. Taamaammat iluassaqaaq ilitsersuisoqarneq Aarhusimi ilinniartutut aallartilluarnermut iluaqutaasinnaappat, Sven Kolte oqarpoq.
Ilinniartunut aallartittunut aallartisarnermi nassuiaasarneq aammalu ilinniartunut attaveqarneq Aarhusimi Kalaallit Illutaanni ingerlareerpoq. Maanna ilinniarfiit tikillugit attaveqarneq tapertaalersussannngorpoq.