Ilinniartut unititsisartut suli amerlapput!
Ilinniartut taamaatiinnartarnerat naalakkersuisunit annikillisinniarneqarpoq, isumaginninnermili siunnersortinngorniat ilinniarfianni pisortaagallartup oqaatigaa, ilinniartut taamaatinnartartut suli amerlavallaartut.
- Nalinginnaaneruvoq, soorlu ukiumi nutaami ilinniartut aallartikkaangata marluk pingasut missaani taamaatittarnerat, taama oqarpoq, Isumaginninnermi siunnersortinngorniat ilinniarfianni utaqqiisaasumik rektoriusoq Lis Mona Jensen. Taanna aamma oqarpoq, naammassisut kingulliit 17-t missaanniillutik aallartikkamik sisamaannaat naammassisimasut. Ukiormannalu decemberimi naammassisussat aamma 20-t missaanniillutik aallartissimasut maannamullu arfineq-marluinnanngorsimasut.
- Sooruna taamaatiinnartoqartartoq?
- Ilaatigut tunngaviusarput; malinnaasinnaanatik aammalu maani ilinniarfimmi ilinniutit atuakkat kalaallisut nutserneqarnikuunngimmata maanilu ilinniartitsisuusut amerlanerit qallunaajummata, oqarpoq.
- Tamanna qanoq iliuuseqarfigineqarsinnaava?
- Isumaga malillugu inuttut ataasiakkaatut piffinni qinnuteqarfissallu aallartinnginnerini ilinniarfiup ornilikkap suut piumasaqaatiginerai ilisimanissaat pingaartuuvoq. Inuit sianerlutik allagaqarlutilluunniit maanga paasiniaasinnaapput, Lis Mona Jensen oqarpoq.
Taanna aamma erseqqissaavoq, ilinniarluni aallartinnginnermi piareersarluarnissaq pingaartuusoq.
- Isumaga malillugu piareersarfissat assigiinngitsorpassuupput, maannakkut ukiuni 2000-likkaani inuuffigisatsinni pitsaasupilussuit pigaavut: oqarasuaatitigut imaaliallaannaq paasiniaasinnaanerit, qarasaasiaq atorlugu ilinniarfeqarfinnut paasiniaasinnaanerit, il.il.
Minnerunngitsumik aamma ilinniarnermi aallartilinnginnermi pingaarutilittut isigivara, inuttut ataasiakkaatut akisussaaffimmik annertuumik tigummiaqarnissaq, ilinniagaqarluni aallartinnermi imminut piumaffigingaatsiarnissaq. Imaanngilarmi piumallerluni aggeraanni angusisoqarsinnaanera. Aammali inuttut ataasiakkaatut pingaaruteqarpoq, ilinniakkamut pilliuteqarnissaq taanna piginngikkaanni isumaga malillugu ilinniartussaq suli piareersaqqittariaqarpoq kajungeriguniuk taanna ilinniarusullugu, Lis Mona Jensen oqarpoq.
Ilinniagaqarnermi pisortaqarfimmi immikkoortortaqarfiup pisortaata Mikael Kristensenip ilimagaa, ilinniarlutik aallartissimasut 60 procentii naammassiumaartut. Pisortaqarfimmiilli siunertarineqarpoq 70 procentit naammassinissaat.
