Ilinniartut ulluat DK-mi
Savalimmiormiut kalaallillu ilinniartui ullumi ullorsiulerlutik Christianborgip ataatsimiittarfiani katerisimaalerpata, ataatsimiittarfik ulikkaassagunavippoq. Ilinniartut 180-it peqataaniarlutik nalunaarsimapput, takkunannga kalaallit 50-it peqataaniarlutik nalunaarsimapput, taama Atlantikup Avannaani Suleqatigiit ilaasortaasa allattaat Mininnguaq Kleist nalunaarpoq.
Ilinniartut ullorsiorneranni oqalugiartarnissani tusarnaarianut ilaassapput nunatsinni inatsisartuni siulittaasoq Jonathan Motzfeldt aammalu Savalimmiut folketingimut ilaasortaatitaat Anfinn Kallsberg.
Katerisimaarneq danskit nalunaaqutaat malillugu nalunaaqutaq ataatsimiit aallartinneqassaaq, tassanilu Høgni Hoydal, tikilluaqqusisuussaaq. Taassuma kingorna kalaallit folketingimi ilaasortaatitaat oqalugiassapput. Aamma Folketingimi ilaasortat allat, Venstreneersut, Socialdemokratineersut Dansk Folkpartiimeersullu aamma oqaaseqassapput.
Sisamanut qiteqquppat statsiminnisteri Anders Fogh Rasmussen oqalugiassaaq. Taasuma kingorna Lars-Emil Johansen, Kuupik Kleist aamma Høgni Hoydal oqalugiareerpata, avatangiisimut ministeri Connie Hedegaard oqalugiassaaq. Ilinniartut ulluat tallimanut naammassineqarpat, Savalimmiormiut illuanni Københavnimiittumi ilinniartut nuannatissapput.
