Ilinniartut ulluanni ilinniartut 130-t Folketingimukassapput
Ilinniartut Nunatsinneersut Savalimmiuneersullu 130-t naalagaaffeqatigiinni politikerit inuussutissarsiutinillu ingerlatallit ullumi naapissavaat, tassanilu saqqummiussisoqassaaq oqallittoqarlunilu, ilinniartut naammassigaangamik qanoq iliorluni angerlamut utertarnissaat eqqartorneqassalluni.
Ilinniartut ilaatigut naapissavaat danskit aningaasaqarnermut naalakkersuisuat, Lars Løkke Rasmussen, savalimmiormiumik nuliaqartoq, Folketingimut ilaasortat, Julie Rademacher, kalaallinit kingoqqisoq, kiisalu Line Barfod.
Kommuneqarfik Sermersuup borgmesteria, Asii Chemnitz Narup, aamma Nukissiorfiit pisortaat, Svend Hardenberg, Danmarkimi ilinniagaqarsimasoq, ilinniartut Nunatsinneersut naapissavaat. Svend Hardenbergip ilinniareernermi kingorna Nunatsinnut uterami misigisani ilaatigut oqaluttuarissavai.
Ilinniartut Danmarkimi tamanit bussinik aaneqassapput, Christiansborgimilu Danmarkimi nalunaaqutaq malillugu nalunaaqutaq ataatsimut naapissapput, tassa uagut nalunaaqutarput malillugu nalunaaqutaq qulingiluanut.
