Ilinniartut sungiusarfissaat pillugit sulipput

Ilinniartut 170-it sungiusarfissaaleqisut suliffinnik sungiusarfissanik amingaateqartarnerat aallaavigalugu, Siumut sinnerlugu inatsisartuni ilaasortaq Doris Jakobsen inatsisartut upernaakkut ataatsimiinneranni oqallinnissamik siunnersuuteqarpoq.

- Ilinniartoqarnikkut aammalu inatsisitigut aaqqissuusseqqinnissaq pisariaqartutut isigingakku, aammalu suliassaaleqisarneq tunngavigalugu aaqqissuusseqqinnissaq ilinniartitaanikkut pisariaqarsorigakku. Aamma kikkut ilinniartuuteqartarnersut nalunaarsorneqartariaqarsoraakka, isumaqarama nunaqavissut kisimik ilinniartunik tiguserusuttartut, Doris Jakobsen oqarpoq nangillunilu; - Kikkulluunniit nunatsinni suliffiutillit pisussaaffilerneqartariaqarput ilinniartuuteqartarnissamik, taamammi ilinnartut ilinniarfissaqanngitsut amerlatigisut. Nunatsinni ilinnartuuteqartartut suliassaqartittuarneqarnissaat aamma qulakkeerneqartariaqarpoq, Doris Jakobsen naggasiivoq.

Ilinniartut ilinnialerusuttullu atugaasa misissuiffigineqarnerat ingerlasoq, Iliniartitaanermut naalakkersuisumut Henriette Rasmussen oqarpoq.

- Suliassaq taanna ukiut marlussuit kingulliit annertuumik inatsisartutigut aammalu pisortaqarfinni suliarineqarput, suliassallu assigiingnittutigut ingerlanneqarlutik. Ilinniartitaanermut naalakkersuisoq Henriette Rasmussen aamma oqarpoq, sulisitsisut ilinniartullu akornanni atugarisat pitsanngorsarniarlugit ilinniartitaanermut, anigaasaqarnermut aammalu suliffissaqartitsinissamut pisortaqarfinni, politikerit siunnerfii anguniarlugit sulisoqartoq.

- Misissuinissami anguniarneqartunut ilaavoq, ilinniartut amerlanerit ilinniakkaminnik naammassinnittalernissaat, ikerinnakkummi atuarnerminnik unitsitsisartut suli amerlavallaaqaat, Henriette Rasmussen oqarpoq nangillunilu; - Aaqqissuussineq nutaaq aamma aallartinneqarnikuuvoq. Tassani sulisitsisoq ilinniartuutilik, ilinniartup naammassinissaata tungaanut tigumminnittussatut, aammalu ilinniartup akissarsiassanik sulisitsisoq isumaginnittussanngortillugu aaqqissuussiffigineqarpoq. Taamaasilluni ilinniartup sulisitsisullu akornanni pitsaanerusumik suleqatigiinneq pilersinneqarsinnaalerpoq, Ilinniartitaanermut Naalakkersuisoq Henriette Rasmussen naggasiivoq.

Ilinniartut atugarisaat pillugit misissuisoqarneranut Doris Jakobsen isumalluarpoq, suliniarnerli arriippallaarsoraa.

- qilanaaraata taassuma naammassineqarnissaa, ajornartorsiutilli taama sivisutigisumik ingerlasimaneranut atatillugu, isumaqarpunga suliniarnerup arriippallaamik ingerlanneqartoq, taama oqarpoq Siumut sinnerlugu inatsisartuni ilaasortaq Doris Jakobsen.