Ilinniartut sungiusarfissaannik amigaateqartoqarpoq

Pineqaatissinneqarsimasunut inissiisarfiup matoqqasup nutaap Nuummi sananeqarnera, Nuummilu umiarsualiviup allilerneqarnera ilaatigut pissutaalluni Nunatsinni sanaartorneq ataatsimut isigalugu siuariartorfiuvoq. Aasianni ilinniarnertuunngorniarfik aamma allanngortiterneqarpoq, Ilulissanilu Atuarfik Mathias Storch nutaaq aamma sananeqarluni.

Nunatsinni inuussutissarsiutit immikkoortuani pineqartumi suliffeqarfimmik ilinniarfissamik qinnuteqaateqartut piukkunnartut 100-nit amerlanerusut, Naalakkersuisut nittartagaani aamma allaaserineqarpoq.

Tamannalu iliuuseqarfigineqartariaqartoq, Ilinniartitaanermut Naalakkersuisoq Nivi Olsen, Attaveqarnermullu Naalakkersuisoq Knud Kristiansen, aamma Sulisitsisut Peqatigiiffianni siulittaasoq Henrik Leth oqarput.

Qinnuteqartut suliffeqarfimmi sungiusarfissamik neqeroorfigineqartut 2009-mili 69-init 26-nut ikileriarsimapput, 2013-imi 2014-imilu sanaartortoqanngippallaarnera aamma pissutaalluni. Sanaartornerulli siuariartornera ilutigalugu ilinniartut sungiusarfissaat amerlineqartariaqarput:

- Soorunami ilinniartut suliassaqartinneqanngippata ilinniartoqartariaqanngilaq. Taamaattoqarpat ilinniarnermi sungiusarnissaq siunertaarutissaaq. Sanaartornerilli maannakkut amerleriaqqimmata pisortat namminersortullu suliffeqarfiisa ilinniartoqaqqilernissaat piffissanngorpoq, Henrik Leth oqarpoq.

Ilinniartitaanermut Naalakkersuisoq isumaqataavoq:

- Piginnaasalinnik taamatut qinnuteqartoqarnera iluarusunnartorujussuuvoq, tassungali peqatigitillugu taakku sungiusarfissaqannginnerat pissutigalugu maanngaannartinneqartarnerat nikallornarpoq, Nivi Olsen oqarpoq, nangillunilu:

- Inuusuttut ilinniarnissaat tamatta soqutigisaraarput, taamaalillutik inuiaqatigiit ineriartornerannut peqataaniassammata, Ilinniartitaanermut Naalakkersuisoq Nivi Olsen oqarpoq.
 
Kalaallit Nunaanni sanaartornerni tamani ilinniartoqarnissaa suli sulissutiginiarlugu, taassuma ilanngullugu neriorsuutigaa.