Ilinniartut suliffissanik nittarsaassiffigineqassapput
Kalaallit Nunaanneersut Qallunaat Nunaanni ilinniagaqartut allallu ilinniakkaminnik naammassinnereersimasut Kalaallit Nunaanni suliffittaarnissamik soqutiginnilersinniarlugit Namminersornerullutik Oqartussat Aalborgimi Odensemilu ulluni 15. aamma 16. november 2008-mi suliffissanik nittarsaassiniarput.
Suliffinnik nittarsaassineq Avalak suleqatigalugu Namminersornerullutik Oqartussanit aaqqissuunneqarpoq.
Suliffeqarfiit katillugit 25-t Namminersornerullutik Oqartussaneersut, kommunineersut namminersorlutillu suliffeqarfinneersut pilerisaarinermi peqataassapput. Taakku ilagaat Sulisitsisut peqatigiiffiat:
-Suliffissanik pilerisaarinermi peqataanitsigut neriuutigaarput ilinniakkanik naammassisaqareernerup kingorna kalaallit suliffeqarfiutaat ajornannginnerusumik sulisussanik pissarsisalernissaat. Suliffeqarfiimmi amerlanersaat sulisussanik ilinniarsimasunik pisariaqartitsipput, GA-mi allaffeqarfimmi pisortaq Karsten Klausen oqarpoq.
Royal Greenland aallarteqqaarnermiilli sulisussarsiortitsinermi peqataatitaqartarpoq - maskinmesterinik, tunisassiornermi ingeniørinik kiisalu ingerlatsinermi nerisassalerinermilu teknikerinik atorfissaqartitsinertik pissutigalugu.
Royal Greenlandip nunami ingerlatsinerani sulisoqarnermut pisortaq Esther Juhl oqaluttuarpoq, inuusuttut ilinniarnermik aallartitsinnginneranni praktikkertussanut imaluunniit ilinniagaqartut bachelorinngorniarnerminni suliaqartillugit pilerisaaruteqartarniarlutik.
