- Ilinniartut ernigunik kollegiaminniiginnarnissaminnut pisinnaatitaaffeeruttarnerat ajornartorsiutitut isigaarput, ilinniartut siunnersuisoqatiiffiannit Pitameersoq Soriina Davidsen oqarpoq.Assi: Studenterrådet Pitaq

Ilinniartut siunnersuisoqatigiiffiat: Meerartaaqqammisut kollegiamiiginnarsinnaasariaqarput

Ilinniartut kollegiaminnit erninermut atatillugu ilinnianngiffeqarnermi anisinneqarsinnaanerat naleqqutinngitsoq, ilinniartut siunnersuisoqatigiiffiat Pitaq isumaqarpoq. Ataatsimiitsitaliami siulittaasoq isumaqataavoq.

Ilinniartuuguvit naartulersimallutillu kollegiat annaaratarsinnaavat.

Inatsisimmi malillugit erninermut atatillugu ilinnianngiffeqaruit ilinniarnerit unitsissavat, kollegiaqarnissamullu pisinnaatitaaffeqarunnaarlutit.

Inatsit allanngortariaqartoq ilinniartut siunnersuisoqatigiiffiat Pitaq isumaqarpoq.

- Ilinniartut ernigunik najugarisartik inatsisit malillugit qimattariaqartarnerat, ilinniarnerminnillu unitsitsisariaqartarnerat ilinniartut siunnersuisoqatigiivininngaanniit Pitarmiit ajornartorsiutitut isigaarput, Soriina Davidsen oqarpoq.  

Taassuma Ilisimatusarfimmi ilinniartut siunnersuisoqatigiiffiat Pitaq sinnerlugu ilinniartoq Tuperna Kristiansen peqatigalugu kollegiat pillugit inatsisip paragrafiata 38-ip allanngortinnissaa sulissutigaa.

AAMMA ATUARUK Meerartaarnermut atatillugu sulinngiffeqarnermut aningaasaateqarfiup aallartinnissaa: Qaammataannanngortoq

Tassani allaqqavoq, erninermut atatillugu ilinniarunnaarallaruit kollegiaqarnissamut pisinnaatitaaffeqarunnaassasutit.

Ilinniartuuguvit meerartaarlutillu ilinniarnerit unitsittariaqanngikkukku unitsikkallartariaqartussaavat. Taava kollegiaqarunnaarnissat pissusissamisuunngila?

- Ilinniartorpassuit sineriamminngaanniit Nuummut ilinniariarlutik tikittarput. Tassanilu ilinniagaqarnerminni naartulerulernik inatsitsit malillugit najukkamiit anisariaqarnerat ajornartorsiutitut isigaarput. Meerartaarnissartik peqqutigalugu kollegianiit anisariaqarnerminni illoqarfimminnut angerlartussanngortarput, Soriina Davidsen oqarpoq. 

Tuperna Kristiansen

Ilinniartut erninermut atatillugu ilinnianngiffeqarnerminni kollegiaminniiginnarsinnaatinniarlugit kollegiat pillugit inatsit allanngortinneqartariaqartoq Ilinniartut siunnersuisoqatigiiffiannit Pitamit Tuperna Kristiansen isumaqarpoq.

Inuit ilinniarnerminnik naammassinninnissamik tungaanut meerartaarnissatik utaqqiinnarsinnaanngilaat?

-Tamanna pilersaarusiorneqartuaannarsinnaanngilaq. Inuunermi taamaattoqartarpoq, Tuperna Kristiansen oqarpoq.

Inatsisit imminnut assortortut

KNR-ip Pitamit isornartorsiuutit Inatsisartut kultureqarnermut, ilinniartitaanermut ilisimatusarnermut ilageeqarnermullu ataatsimiititaliaata siulittaasuanut Sofia Geislerimut (IA) ingerlateqqippaa.

Sofia Geislerillu ilinniartut siunnersuisoqatigiiffiat isumaqatigalugu inatsisillu allanngortinnissaa sulissutiginiarlugu Sofia Geisler oqarpoq.

- Illoqarfigisaq qimallugu allamut ilinniariartornermiit marlunnik angerlasimaffeqarluni akilersuineq piviusorsiortuunngitsoq nalunngilarput. Ullumikkut 2021-imiikkatta naleqqussaasariaqartugut isumaqarpunga. Nalunngikkaluarlugu kollegiat pigineqartut amerlassusaat kissaatigisatsituut amerlatiginngitsut, kisianni pissutsinut ullumikkumut atuuttunut naleqqussaasariaqarpugut, Sofia Geisler KNR-imut oqarpoq. 

Sofia Geislerip paragrafit Pitaq kajumissaaruteqareersoq misissorsimavai, malittarisassallu marluk imminnut assortortut paasisimallugu oqarluni.

Namminersorlutik Oqartussammi ilinniarnermut ikiorsiissutit pillugit nalunaarutaanni 2017-imeersumi erninermut atatillugu ilinnianngiffeqarneq ilinniakkanik unitsitsinertut isumaqanngittoq allaqqavoq, tassalu ilinnianngiffeqarnermi ilinniartutut pisinnaatitaaffeeqaannartoqarsinnaalluni.

Kollegianulli inatsimmi 2019-imeersumi akerlerluinnarmik allaqqasoqarpoq. Tassani erninermut atatillugu ilinnianngiffeqartoqarpat, tamanna ilinniarnermik unitsitsinertut isigineqartariaqartoq allaqqavoq. Tassalu kollegiaqarnissamut pisinnaatitaaffeqarunnaartoqassaaq.   

Allannguutissatut siunnersuuteqarniartoq

Sofia Geislerip inatsisit taakku marluk sooq imminnut assortornersut nassuiarsinnaanngilaa. Tamannali aaqqittariaqarsoraa kollegiaqarnermullu inatsisip allanngortinnissaa sulissutiginiarpaa.

- Paasisinnaavara. Inatsisinik marlunnik assigiinngitsunik oqariartortunik peqarsinnaanngimmat, periarfissat marluupput. Naalakkersuisut kollegiat pillugit inatsimmut 2019-meersumut immikkoortuanut tassaniittumut allannguutissatut siunnersuusiorfigisinnaavaat, Inatsisartunullu saqqummiullugu. Imaluunniit Inatsisartuni ilaasortaasugut allanguutissamik siunnersuummik ukiarmanna Inatsisartut ataatsimiinnissaannut atatillugu saqqummiussisinnaavugut.

Ilinniartut inissaaleqisut amerlapput. Tamanna ilinniartut ernigunik inissiap ilinniartunut allanut inissaaleqisunut tunnniunnissaa pissusissamisoornerunngila?

- Ilinniartut ilinniartuunermik nalaani meerartaassanngitsut oqassalluni ullutsinnut naleqqutinngilaq. Ilinniartuunersiuteqarnermut tunngatillugu aalajangersakkani 2016-ip kinguninnguatigut aalajangersaaffigineqarsimavoq, ilinniartut naartulerlutik atuanngiffeqarallartussat kollegiami inigisaminnik tigumminniinarsinnaanissaat. Taannalu kingusinnerusukkut inatsisiliornermi atuutinneqartut eqqarsaatigalugit aallaavigisariaqarparput. Pisinnaatitaaffik pilersereersimasarput taanna aallavigalugu naleqqussaasariaqarpugut, inatsisillu ikinnerpaammik taakkua marluk atuuttut imminnut naapertuuttunngortittariaqarlutik, Sofia Geisler oqarpoq. 

Kollegiaqarnermut inatsisip qaqugorpiaq allangorneqarnissaa Sofia Geislerip oqaatigisinnaanngilaa.

KNR-ip ilinniartitaanermut naalakkersuisut, Peter Olsen (IA), apersorniarsarigaluarpaa, sulili iluatsinnagu.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl