Ilinniartut SIK-mut ilaasortanngulerput
- Inuusuttut inuiaqatigiinni peqataanerunissartik, minnerunngitsumik sulianik unammillernartussarpassualimmut alloriarneq tiguaat, KIK-mi allaffimmi pisortaq Poul Olsen taama oqaaseqarpoq, naqissuserlugulu siunissami SIK-p inuusuttai ilaasortarpassuaqalissasut inuiaqatigiinni suliassanut angisuumik sunniuteqarfigilluagassaminnik.
- Ilinniartut pillugit suliniarnerup saniatigut aamma inuusuttut ilaasortat allat nunatsinni susassaqarfinnut peqataatinneqarnerulernissaat, SIK-mut ilaasortanngornitsinni eqqarsaataavoq. Suliassatta siulliit ilagissavaat, SIK peqatigalugu ilaasortanut paasissutissiinermik suliaqarnissarput, taamaalilluni kattuffimmut ilaasortaaffeqarneq inuusuttumut, inuaqatigiinnullumi aamma iluaqutaasoq paasineqarniassammat, Poul Olsen oqarpoq.
Inuusuttut SIK-mut ilanngunnissartik aalajangiummassuk, SIK-p siulittaasuata Jess G. Berthelsenip nuannaarutigeqaa.
- Inuusuttut piumassusillit kattuffimmi akuunissaat, ukiorpassuanngortuni angorusussimavara, taamaattumik SIK-p inuusuttunut immikkoortortaa piviusunngulermat nuannaarutigeqaara. Sulisartut Kattuffeqarnerat annertuumik inuiaqatigiinni pingaarutilimmik inississaaq, inuusuttummi allanngoriartulerfimmi piareersimallutik suleqataasussat tamaasa atorfissaqartippavut. SIK-p inuusuttaasa kinguaariit nikinnissaat inuusuttunut qulakkiissammassuk isumalluaqaanga, SIK-p siulittaasua Jess G. Berthelsen taama oqaaseqarpoq.