Ilinniartut nunaminnut utertut qitornamik paaqqinnittaqarfimmi inissaqartinnissaanut ikiorneqassanngillat
-Meeqqat atuarfii tikillugit meeqqerivinnut sanaartornissamut ingerlanneqarnerannullu apeqqut kommunit tamakkiisumik akisussaaffigivaat, apeqqullu pillugu Naalakkersuisut pilersaaruteqanngillat tamakkununnga aalajangersakkat allanngortinneqarnissaanerat siunertaralugu, tamakkumi kommunit Namminersorlutik Oqartusallu akornanni nammaqatigiinnissamut isumaqatigiissutaanni aalajangersaavigineqareersimammata. Naak Naalakkersuisut tunngaviatigut aqqutissiuusseqataaffigerusukkaluaraat, meeqqat sumi najugaqarnerat ilaqutariinnikkut il.il. inissisimanerat apeqqutaatinnagu ulluinnarni paaqqinnittarfinni inissaqartinniarneqartuartariaqartut, Naalakkersuisut pilersaarutiginngilaat innuttaasut akornanni inuit aalajangersimasumik inissisimasut immikkut salliutinneqartalernissaat aqqutissiuutissallugit, Palle Christiansen akissuteqaammini allappoq.
Tassa imaappoq, ilinniartut nunaminnut uternerminni qitornamik paarineqarnissaat nammineerlutik isumagisariaqarpaat. Tamannamita pissutigalugu nunani allani ilinniartorpassuit angerlaqqinngitsoortarnerlutik?
Olga P. Berthelsenittaaq apeqqutigaa ilinniartut nunaminnut uternerminni, taamatumullu ilinniagaannik nunatsinni atuinissamut, qitornamik paarineqarnissaannut pitsaanerusunik periarfissaqartinneqassappata, allannguutit suut pisariaqarnersut.
Tassunga atatillugu Palle Christiansenip paasissutissiissutigaa Meeqqanut suli atualinngitsunut perorsaanikkut inerikkiartuutaasunik ulluunerani neqeroorutit pillugit Inatsisartut inatsisaanni nr. 16 3. december 2012-meersumi §9-mi aalajangersakkat allanngortinneqartariaqassasut. Naalakkersuit taamatut allannguisoqarnissaanik pilersaaruteqanngillat.
