Ilinniartut namminneq pisuusarnertik nassuerutigaat
Ilinniarnertuunngorniarfinni ilinniartut atuanngitsuukulasartut amerliartuinnavipput, ilinniartullu namminneq nassuerutigaat atuanngitsuukulasarnertik namminneq pisuussutigisarlugu.
Atuanngitsuukulaneq pissutaalluni kingullerpaamik periarfissinneqarsimasut ilagaat Aasianni GU-mi ilinniartut 21-nik ukiullit Qaajunnguaq Nielsen aamma Nuummi GU-mi ilinniartoq Minik Dam Holm.
- Peqqutaagajunnerusarpoq soorlu kammalaatitaartorsimalluni GU-lersimagaanni ilagalugit unnukkut pigaartarneq aqaguanilu makinnissamut eqiasunneq, ilinniagasserinissamullu piffissaq kingullerpaaq atorlugu ilinniagasseriniartarneq, Qaajunnguaq Nielsen oqarpoq. Taanna aperaarput, taamatut misigisaqarsimaneq qanoq innersoq.
- Peqqissiminartorujussuuvoq, ingammik taakkua eksamenissutissat kingullerpaat takullugit peqqissiminartorujussuuvoq,
Aasianni ilinniartoq Qaajunnguaq Nielsen akivoq.
Ilinniartut kingullerpaamik periarfissinneqartarput aatsaat mianersoqqussutit tamaasa pereeraangamikkit. Tamanna ilinniartut namminneq nalunngereertaraat Minik Dam Holm-ip oqaatigaa.
- Nammineersinnaassuseq pingaarnerpaat ilagaat. Inuk nammineq aalajangiisussaavoq una atuarnera ajunngitsumik ingerlassava? imaluunniit ajortumik ingerlassava?
Minik Dam Holm aperaarput, festernerit kammalaatitaartornerillu taamatut pisoqartarneranut pisooqataanerusarnersut.
- Patsisaaqataasarput suu, aamma ilaasa atornerluttarpaat soorlu ilinniakkerinngitsoorsimagaanni immaqa tiimit siulliit siniinnaruma taava ilinniagassakka suliarisimanngisakka takutissanngilakka. Soorlu uanga una atornikuuara tulluusimaarutiginngikkaluarlugu annikilliuummik imaluunniit misigissutsikkut ajorama taava suna tamaat puigortuusaarlugu atuartussaagaluarlunga angerlarsimaannarlunga, soorlu tamakku assersuutigineqarsinnaapput. Kisianni tassa ajornartorsiutaasartut assigiinngitsorpassuupput, kisianni ilinniartuulluni qanorluunniit ikkaanni nalunngilarput atuariartunngikkuma suliassakka suliarinngikkukkit ajortumik ingerlassaanga tamaavitta nalunngilarput aallartikkattali, tassa nammineq inuk aalajangiisussaavoq, Minik Dam Holm oqarpoq.
