Ilinniartut makitsinikkut ilaqutartaarput
Ilaqutariinnik ullut tamaasa eqquisoqarneq ajorpoq, Paamiunili sapaatip akunnera kingulleq taama pisoqarpoq.
Tassami Paamiuni Imarsiornermik ilinniartut 20-t missaanniittut ilaqutariinnut pulaartarsinnaalerput.
Imarsiornermik tunngaviusumik ilinniartut imarsiornermik ilinniarfimmi ingerlanneqartumi inuusuttuaqqat atuarfimmit naammasseqqammersut Paamiuni kiserliunnginnerunissaat taamaaliornikkut anguniarneqarpoq.
Paamiuni innuttaasut 100-t missaanniittut soqutiginneqalutik sapaatip akunnerata qaangiutilersup ingerlanerani ilinniarfiliaapput, ilinniartunik pulaartartussanik pissarsisinnaarusullutik, pisorlu suliniaqatigiiffiup Paamiut Asasarap ilinniarfiullu aaqqissugaraat.
Ilaqutariit kajumittut ilinniartunik pulaarteqartarusuttut atitik sumiiffitsillu allattorpaat kingusinnerusukkullu makitsinikkut ilinniartut pulaartarfissatik nassaaraat.
Tunngaviusumik imarsiornermik ilinniartut aappaagu aasarluinnarnerata tungaanut Paamiunissapput, pulaartarnermullu aaqqissuussineq siunissami ilinnialertartussanut atuutsinniarneqarpoq.
Ilinniartut inaanni inspektøri, Thorkild Nielsen, Kommuneqarfik Sermersuup nittartagaani oqarpoq, ilinniartut susassaqartarnissartik pisariaqartittaraat, annerusutigut Paamiuni sumukarfissaqartannginnamik.
