Ilinniartut kommunini politikki soqutiginngilaat

Kommunimut regionsrådinullu qinernermi qinersisinnaatitaasut ilagaat ilinniartut 400-t, ilinniarnermik nalaani Nunatsinni Danmarkimilu qinersisinnaatitaasut. Danmarkimili qinersinissaq soqutigineqarpallaanngilaq, Avalaap siulittaasua oqarpoq.

-Ilinniartut ataasiakkaat nammineq kajuminnertik tunngavigalugu malinnaapput. Ilinniartorpassuilli malinnaanngillat, Nunatsinni politikkimi pisut malinnaavigerusunnerugamikkit aammalu angerlangajaleriaramik Danmarkimi kommunimut qinersisariaqanngitsutut misigisimagamik, Hans Peder Kirkegaard oqarpoq.

Avalaap aamma Danmarkimi najukkami nunallu immikkoortuini politikki immikkut sulissuteqarfiginngilaa.

-Kalaallit politikerii sammineruagut, ilaatigut atorfinnik nittarsaassinermut atatillugu ilinniartitaanermut naalakkersuisoq peqatigalugu isummersueqatigalugu.

Peqqutaasut ilagaat, ilinniartut qineqqusaarnermi tusaaniarneqanngitsutut misigisimanerat. Kalaallinut qinersisartunut ataatsimiititsinituaq suliniaqatigiiffimmit Stemmer på Kantenimit, inunnik ikiortarialinnik qinersititsinissamik suliniuteqartup, aaqqissuussaraa.

-Ikiortariaqartut kisiisa samminiarneqarnerat, uagullu Danmarkimi ingerlalluartut mininneqarnerput ajuusaarnarpoq, Hans Peder Kirkegaard oqarpoq.

Danmarkimi kommunimut nunallu immikkoortuinut qinersinermi kalaallinik qinigassanngortittoqanngilaq.