Ilinniartut inuuniarnikkut atugaat misissorneqalerput

Aningaasanik atorniarnermi periarfissat ajornerusut. Bussinut billetsinut taperneqarneq ajorneq. Kalaallit Danmarkimi ilinniartut ilinniartunit allanit atugarliornerullutik naammagittaalliortuarput. Tamanna ilumoornersoq misissorneqalerpoq.

- Ilinniartut atugaasa Danmarkimi nunani allanilu ilinniartoqatiminnut sanilliullugit ajornerunnginnissaat siunertaavoq, Niels Thomsen, partiit naalakkersuisuutitaqartut pingasut sinnerlugit saqqummiisuusoq taama oqarpoq.

Tassalu siunertaavoq kalaallit Danmarkimi nunanilu allani ilinniartut atugaat misissorneqassasut, taavalu ilinniartut nunani allamiut atugaannut naleqqersuunneqassallutik.

Siunnersuut siullermeerlugu oqaluuserineqarmat Inatsisartuni akerlilerneqarani ingerlaqqippoq.

Misissuineq sumik kinguneqassanersoq, Niels Thomsenip maannangaaq oqaatigisinnaanngilaa. Aanali siunertaa:

- Allanngortitsilaassalluta aalajangiissangaluarutta, immaqa pissutsinut assigiinngitsunut naleqqussaalluta, ilisimasaqarluarluta aalajangiissaasugut.

Misissuineq inatsisartut ukiakkut ataatsimiinnissaat sioqqulluarlugu naammassineqassaaq.