Ilinniartut inissaqartitaaneri pillugu Palle Christiansen isornartorsiuivoq

Demokraatinneersup oqaatigaa maanna Naalakkersuisuusut siulii ilinniartunut inissaqartitsiniarlutik sinerissami tamarmi sanaartortitsisimasut.

Aningaasanut inatsisissamut siunersuummi, 2014-moortumi, ilinniartut inissaannik sanaartornissamut aningasanik illuartitat ikippallaartut, Palle Christiansenip oqaatigaa.

- Nick Nielsenip taama oqariartuuteqarnera allaanngilaq nappartaq imaqanngitsoq innaarsutsigut nakkaapaluttoq, Palle Christiansen ugguaqisoq oqarpoq.

Ilinniarusullutik ingerlaqqinniartut kikkut tamarmik assigiimmik iliuuseqarfigineqartut, Nick Nielsenip siusinnerusukkut oqaatigisareerpaa, oqarluni Sisimiormiut illoqarfimminni ilinniarusukkaluartut Nuummiutut aamma ajornartorsiuteqarmata.

Sisimiunili DTU-mit oqaatigineqarpoq ilinniartut Sisimiuneersut taamaallaat marlussuit illoqarfimminni inissaqanngitsutut nalunaarsorsimasut.

Palle Christiansen isumaqarpoq, Nuummi ajornartorsiut annerujusuussoq, tassami Nuummiipput ilinniarfiit amerlanersaat. Palle Christiansenilli erseqqissarpaa illoqarfik ataasiinnaq aaqqiivigineqartariaqanngitsoq.

- Sumiiffiup ataasiinnaap aaqqiivigineqarnissaanik oqalunneq isumaqatiginngilara. Uangut Naalakkersuisuunitta nalaani illoqarfinni allani ilinniartut inissaqartitaanissaat isumagaarput, kisianni aamma Nuummi inissaqarnissaat isumagalutigu.

Palle Christiansenip aamma eqqaavaa, inuusuttut Nuummiut arlalippassuit misigisimassasut, Nick Nielsenimit immikkoortinneqarlutik.

- Ukioq atuarfiusoq tulleq septembarimi aallartippat ajornartorsiut Nuummi taannaajuassaaq taamaattumik maanna Naalakkesuisuusut Nunatsinni ilinniartoqarfiunerpaaq Nuuk siulliullugu sullittariaqarpaa.

Inatsisartuni ilaasortaq Demokraatineersoq, Palle Christiansen taama oqarpoq.

Kommuneqarfik Sermersuup borgmesteria, Asii Chemnitz Narup piffissami kingerllertigut isornartorsiuteqarpoq, Nuummiut inuusuttut illoqarfimminni ilinniarusuttut, ilinniartunullu inissaqartitaannginnerat, Namminersorlutik Oqartussanit aaqqiivigineqartariaqartoq.

Tamatumunnga akissuteqarpoq Ilinniartitaanermut Naalakkersuisoq, Nick Nielsen, oqaatigalugu ilinniartut inissaqartinneqarnissaat siunertarigini, Nuummiinnaanngitsorli Nunarpulli tamakkerlugu aaqqiiviginiarlugu.