Ilinniartut inissaaleqisut suli amerliartorput

Ilinniartut inissaaruttut imaaginnavipput, allaffeqarfilli akisussaasoq oqaaseqartitserusunngilaq.
aggustip 26-at 2010 11:28

Ilinniartut ineqarfiisa allaffeqarfianni KAF-imi paatsiveerunnersuaqarpoq.

Siullermik ilinniartitsisunngorniat inissaaruttut, niuernermik ilinniartut inissaaruttut, inunnik isumaginninnermut ikiortinngorniat sømandshjemmemi hotelinilu najugallit. Aamma maanna biililerisunngorniat inissaaruttut.

KAF-ili oqaaseqarumanngittuarsinnarpoq.

Qaqortumiit biililerisunngorniarluni Saviminilerinermik ilinniarfimmut atuariartortoq Thomas Egede februaarimi naammassisussaq Nuummut juulip 26-ani tikikkamili nuttartitaalerpoq.

-Tikikkama KAF matoqqaanavimmat atuarfissannut saaffiginnikkama utaqqiisaasumik maskinist kollegiamut inissippaanga, tassanilu ineqartussaq 30-ani tikittussaammat tungaannut tassani najugaqarpunga.

Piffissarlu KAF-imiit tagginneqartoq tikilluinnalermat paasiniaasaraluarami erseqqissumik akineqarneq ajorpoq.

-Piffissaq tikilluinnalermat paasiniaasaraluarama akineqarpunga computerinngooq ajormata akisinnaangilaatigut, maannalu hotelimut inissikkallarpaatigut naluara qaqugu paasisaqassanerluta.

Biililerisunngorniaq Thomas Egede Qaqortumeersoq oqaluttuarpoq.

Inunnik isumaginninnermi ikiortinngorniat aqagu tallimanngornermi hotelimiit anisussaasut radioaviisimi ippassaq unnukkut tusarpagut, taakkulu hotelimi ilinniakkerisut alakkarpavut.

Ilinniartut ilaat Henriette Wille ima oqarpoq:

-Ilinniartitsisorput sianerpoq ullunik 14-inik hotelimiinissarput sivitsorneqartoq.

Henriette Wille atuaqatinilu septembarip arfernata tungaanut hotelimi inissipput taassumalu kingorna hotelimiit aninngikkunik marlukkaarlutik najugaqatigiiaalernissaat ilimageqquneqarpoq.

KAF-imiit oqaaseqartitsiniaraluaratta aatsaat aqagu ataatsimeereerunik oqaaseqarsinnaanerarput.