Ilinniartut inissaaleqinermit eqqugaasut

Ilinniagaqarniarluni qinnuteqartup ilinniarnissami aallartinngitsoornera soorunami uggoreqaa. Taanna Nunatsinniiginnarniarluni suliffissarsiorniarlunilu aalajangerpoq, Københavnimilu aappaagu inissarsisinnaanissani neriuutigalugu. Taamaattorli ilinniagaqalerniarluni aallaqqaataaniit qinnuteqartariaqassaaq - imaassinnaallunilu ilinnialernissaminut akuerineqanngitsoortoq.

- Tamanna uggornaqaaq. Pisinnaasannguatsinnik ikiorniarlugu iliuuseqaraluarpugut, naak tamanna ilitsersuisutut suliassatsinnut ilaanngikkaluartoq, iluatsinngitsoorparpulli, Pia Rosing Heilmann oqarpoq.

Ilinniartoq alla aamma inissaqarani ilinniakkaminik aallartitsivoq, taannali inissarsinissami tungaanut ilaquttamini nalaasaarfimmi sinittarluni.

København allanut naleqqiullugu ilinniartunut inissaaleqiffiunerpaavoq. Tassami Odensep kommuniata ilinniagaqalerniartut tamarmik inissaqarnissaat isumagisarpaa, Aarhusimilu kalaallit ilinniartut illoqarfimmi ilinniartut inaannut inuusuttunullu inissianut utaqqisunut siullerpaanngortittarlugit.

Københavnimi Kalaallit Illuutaata taamatut assingusumik aaqqissuussisoqarnissaa kissaatigigaluarpaa, taamaattorli Pia Rosing Heilmannip taamatut iliuuseqartoqarsinnaanera maanna nukissaqarfigineqanngitsoq oqaatigaa.

- Tamannali kissaatigisatta annerpaartaraat, Pia Rosing Heilmann naggasiivoq.