Sisimiuni ilinniartut ineqarfianni sapaatip akunnerata siuliani ikuallattumi ikuallattuulernermut kalerrisaaruteqarsimanngilaq. Ikuallattuulernermut kalerrisaarut 70 koruunimik akeqarpoq.Assi: KNR

Ilinniartut ineqarfiini ikuallattuulernermut kalerrisaarutit piumasaqaataanngitsut

Ilinniartut marluk ineqarfimminni sapaatip akunnerata siuliani ikuallattoqarneranit anigueqqarput. Ilinniartut ineqarfianni ikuallattoqarneranit putsumut ikuallanneranulluunniit kalerrisaaruteqanngilaq, tamanna aamma inatsisit malillugit piumasaqaataanngilaq.

Sisimiuni ilinniartut ineqarfianni sapaatip akunnerata siuliani sisamanngornermi unnukkut ikuallattoqarpoq. Sermitsiaq.ag taama allaaserisaqarpoq.

Ikuallattoqarnerani ajoqusertoqanngilaq, ilinniartulli aqqusinermi nilliasunit itertinneqarsimanngitsuuppata tamanna ajornerusimassagaluarpoq.

Ilinniartummi ineqarfianni ikuallattoqarneranut kalerrisaarummik nalinginnaasumik nammineq ineqarfigisatsinni pisortalluunniit inissiaaterpassuini ilaatigut atorneqartartutut nalunngisatsinnut assingusumik peqanngilaq.

Inatsisit naapertorlugit ilinniartut ineqarfiini qulinit ikinnerusunik sinittarfilinni ikuallattuulernermut kalerrisaaruteqarnissaa piumasaqaataanngilaq. Tamannali allanngortinneqartariaqartoq Sisimiuni Qatserisartut pisortaat, Ole Kreutzmann isumaqarpoq.

- Ilinniartut ineqarfiini ikuallattuulernermut kalerrisaarutinut atortunik peqarnissaa kissaatigineruarput, tamanna aalajangerneq qularnaannerpaassaaq, Ole Kreutzmann oqarpoq.

Ilinniartut ineqarfippassuit ikuallattuulernermut kalerrisaaruteqartut

Nunatsinni ilinniartut ineqarfiini najugaqartut ikuallattoqarnissaannut qanoq sillimaffiginiarneqarnerannut assigiinngitsumik iliortoqartoq, ilinniartut ineqarfiisa aqutsisoqarfiinut paasiniaanermi paasineqarpoq

AAMMA ATUARUK Ilinniartut ineqarfii nungullarsimallutillu oqoqartut

Ilulissani Lions Kollegiet KNR-ip sianernerata nalaani arlaatigut kalerrisaaruteqanngillat, kollegieinspektørilli, Ingolf Skovip ineqarfinni pingasuni ikuallattuulernermut kalerrisaarutit ataasinngornermi ikkussorniarlugit paasissutissiissutigaa.

Campus Kujallermi kollegieinspektørip, Per Rødgaardip ilinniartut ineqarfiini nakkutigisamini arfinilinni tamani ataatsimoortarfinni ikuallattuulernermut kalerrisaaruteqarnerarpaa, ilinniartullu 18-it inorlugit ukiullit ineqarfianni ineeqqat tamarmik immikkut kalerrisaaruteqarnerarlugit.

Upalungaarsimanermut pisortaq: Ilinniartut ineqarfiini ataatsimoorfiit tamarmik ikuallattuulernermut kalerrisaaruteqarput

Nuummi Upalungaarsimanermut Pisortap, Knud Petersenip ilinniartut ineqarfiinit aqutsisut atuarfeqarfiillu/ilinniarfeqarfiillu ABA-mik kalerrisaarutit atorneqarnissaannik kaammattuuteqarfigiuaannarlugit paasissutissiissutigaa. Kalerrisaarutit taakku qatserisarfinnut toqqaannartumik attaveqartuupput.

Nuummi ilinniartut ineqarfiini ataatsimoortarfiini kalerrisaarutit tamarmik ikuallattoqarnerani putsumik malussartartut inissiani ineqartunut tamanut itertitsisinnaasumik nipeqartartut paasissutissiissutigaa. Tamatumalu saniatigut ilinniartut ineqarfiisa ilaat ABA-mik kalerrisaaruteqarnerarlugit.

AAMMA ATUARUK Inernera: Nunap ikuallannera Qeqqata Kommunianut taama akeqartoq

Ilulissani upalungaarsimanermut pisortaagallartup, Jens Dahlip oqarnera naapertorlugu isumaginninnermut tunngasunik ilinniarfiup ineqarfii SPS-kollegiet ineerartaani tamani innaallagiatortunik ikuallattuulernermut kalerrisaaruteqarpoq, ikuallattoqarneranilu toortakkamik qatserisarfimmut toqqaannartumik attaveqartartumik paarlerni tamani toortagaqarluni.

Tamatuma saniatigut ilinniartut nutaat nutseraangata ikuallattoqarnissaanut sillimaniarnermut annaassiniarnissamullu pilersaarut pillugu ukiumut marloriarluni ilinniartitsissutigineqartartut, SPS-imi pisortap tullia, Marianne Nissen oqarpoq.

Sermitsiaq.ag-p allaaserisaa naapertorlugu Sisimiuni sapaatip akunnerata siuliani ikuallattoqareernerata kingunerisaanik Sisimiuni ilinniartut ineqarfiinut akisussaasoq ikuallattuulernermut kalerrisaarutinik ikkussuinissamut isumasiueqquneqarluni, qatserisartut immikkoortortaqarfimmi aqutsisuannit, Poul Olsenimit ikuallattoqareersoq attaveqarpoq.

Isummersuutit

inatsisartut-sal-sep2019.jpg

Inatsisartut Ukiakkut Ataatsimiinnerat



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat