Ilinniartut ilisimatinneqarput: Nammineq inissarsiorniaritsi

- Ilinniarusulluni, sukataarusulluni iliniagaq naammasserusullugu nuanninngilaq taamatut oqarfigineqarluni, Nukakkuluk Svendsen Brugsenimi ilinniartoq oqarpoq.

Kalaallit Nunaanni Brugsenimi KNI-milu ilinniartut 25-it kollegiassaaleqinermit eqqugaapput.

-Ullut 14-it missaat qaangiupput, kolligiassarsinissannik suli tusagaqannginnama kollegiat allattoqarfiannut sianerpunga tassanilu ilisimatinneqarpunga kolligiassaqanngitsungagooq, Nukakkuluk Svendsen Sisimiuni  Brugsenimi ilinniartoq Nuummi niuernermut ilinniarfimmut atuariartornissaminut atatillugu kolligiassaqannginnini pillugu taama oqarpoq.

Niuernermik Ilinniarfimmit periarfissinneqarpoq nammineq inissaminik nassaarsinnaaguni atuariartornissaminut billetsimik akiliunneqarsinnaasoq, inissarsinngikkunilu tassa ilinniarnini ukioq ataaseq unitsikkallartariaqassallugu ilisimatinneqarpoq.

- Ilinniarusulluni, sukataarusulluni iliniagaq naammasserusullugu nuanninngilaq taamatut oqarfigineqarluni, Nukakkuluk Svendsen oqarpoq.

Pisoq pillugu Kalaallit Nunaanni Brugsenimi sulisoqarnermut immikkoortortaqarfimmiut Nukakkuluk Svendsenip saaffigai.

Kalaallit Nunaanni Brugsenip aamma Pisiffiup ilinniartuutai katillugit 25-it kolligiassaqanngitsut paasinarsivoq. Tamannalu ilinniartuuteqartunit akuersaarneqarsinnaanani qisuariarfigineqarpoq, tassami Pisiffik aamma Kalaallit Nunaanni Brugseni Naalakkersuisoqarfimmut allagaqarput.

- Akisussaassuseqanngitsuliorneruvoq ilinniartunut taamatut pissusilersorneq. Kalaallit Nunaannilu ilinniarsimasut amerliartornissaannut anguniagaqarnermut tamanna naapertuutinngilaq, Kalaallit Nunaanni Brugsenimi sulisoqarnermut pisortaq Carsten Olsen pisoq akuersaarumanagu taama oqarpoq.

Taanna nassuiaavoq ilisimaaralugu kolligiassaaleqineq ajornartorsiutaasoq, kisianni ilinniarfeqarfinniit suliffeqarfinnut ilinniartuuteqartunut pitsaanerusumik siusinaartumillu ilisimatitsisoqartassasoq kaammattuutigaa, tassami ilinniartunit namminneq ilisimatinneqaramik.

- Ima pisoqarnissaa pinngitsoortinniarlugu siusinaarluni iliuuseqarnissamut periarfissat arlaliupput. Soorlu suliffeqarfiit ilinniartuutillit piffissaagallartillugu ilisimatinneqarsinnaapput aamma ilinniarfiit atuarnerup aallartinnissaa qanillivallaartinnagu ilinniartunut ilisimatitsereersimassagaluarput, Carsten Olsen Kalaallit Nunaanni Brugsenimi sulisoqarnermut pisortaq oqarpoq.

Kalaallit Nunaanni Brugsenimi ilinniartut tallimat Nuummi atuariarnerminnut atatillugu Brugsenip sulisuminut inissiaataani najugaqartinneqassapput.