Ilinniartut ilaat juullimut angerlarusuttaraluarput akissaqaratilli

- Ilaquttat ilagerusukkaluarlugit ornissinnaanagit, inuttut sakkortuumik misigisimanartarpoq, Miinannguaq Kristensen oqarpoq.

Upernavimmut aappani meerartillu angalassagaluarunik akissaqartinngilaat aningaaserivinnullu atorniarsinnaasimanngillat. ilinniartuulluni akilersoruminaassammata. Taamaammat ilinniarnerminnut atatillugu inigisaminni juullisiortariaqartarput.

- Allatuulli immitsinnut nuannaarsarniartarpugut. Ilaquttagut angajoqqaat allallu najunngikkaluarlugit, nammineq ilaqutariilersimasugut meerartaqarluta juullisiortarpugut. Miinannguaq Kristiansen.

Arlalinnik juullimi angerlarsinnaanngitsunik aamma nalunngisaqarpoq, nalunngilaalu taakku ilaquttatik kammalaatitillu kikkut juullisioqatigissanerlugit ujartortaraat.

- Uanga meerara aapparalu juullisioqatigissavakka, Miinannguaq Kristensen.

Miinannguaq Kristensenip ilinniartut allat kajumissaarpai ilinniarnitik ingerlatiinnassagaat, ilaqartarmata angerlarserlutik ilinniakkaminnik unitsitsiinnartartunik.

Air Greenlandip nittartagaani Nuummiit Upernavimmut timmisartukkut bilitsi siumuinnaq qanoq akeqarnersoq paasiniaratsigu inersimasumut 6.720 koruuneqartoq paasivarput,.meeqqamut marlunniit aqqanilinnut ukiulimmut 3.360 koruuneqarluni. Assersuutigalugu inersimasut marluk meerarlu siumuinnaq Nuummiit Upernavimmukassagunik 16.800 koruuniissapput. Uteqqissagunillu katillugit 33.600 koruuniissallutik.