Ilinniartut ernumanngillat
Angajoqqaat Danmarkimi ilinniartuutillit meeqqamik isumannaallisagaanerat ernumassutigaat, ilinniartitaanermut naalakkersuisoq Doris Jakobsen taama oqarpoq. Ilinniartut namminneq toqqissisimapput.
- Suli saaffiginnittoqanngilaq, Københavnimi kalaallit ilinniartut peqatigiiffianni siulittaasoq oqarpoq.
- Ilinniartut arlaat suli qanoq iliornissaminik ilitsersuutinniarluni saaffiginninngilaq, Maria Wiechman Københavnimi kalaallit ilinniartut peqatigiiffianni, KEKIP-imi, siulittaasoq taama oqarpoq.
Københavnimi kalaallit ilinniartut tamakkerlugit oqaloqatigisimannginnamigit tamaasa sinnerlugit oqaaseqarsinnaanani erseqqissaatigaa.
- Paasilluinnarsinnaavakka angajoqqaat isumaalunnertik peqqutigalugu saaffiginnissimassapata. Suummi tamaasa ajortut tusartuarlugit isumaalunnassaqigami taama ungasitsigisumi qitornaq ilinniariartorsimatillugu. Uagulli Danmarkimi ilinniartut ulluinnarni malugineq ajorpagut, Maria Wiechman oqarpoq.
Maria Wiechmanip nammineq peqqarniisaarniartartut qanimut qaartartumeerinerat misigisimanerarpaa, taamani 2002-mi Balimut angalanerata nalaani marloriarluni qaartartumeerisoqarnerani inuit 200-t toqutaammata. Qaartartumeerineq assut qamuuna misigisaqarfiusimagaluaqisoq annilaanganeq ajugaatinneqartariaqanngitsoq, Maria Wiechman isumaqarpoq.
- Inuit amerlasuut katerisimaarfigisaannukassaguma imaluunniit peqqarniisaarniartartut saassussiffigisinnaasaannukassaguma assut eqqarsarnartoqartissavara. Taamaakkaluartoq annilaanganeq ajugaatikkusunngilluinnarpara taamaaliorumami peqqarniisarniartartut ajugaassapput ulluinnarnilu inuunera ajugaaffigisaqariaqanngilluinnaraat aalajangiusimavara.
