Ilinniartut eqqornerlunneqartunut ilaapput
Air Greenlandip ilaasunik timmisartuussiunnaarnerata kingunerisaanik kalaallit Danmarkimi Norgemilu ilinniariartussallutik aallartussaagaluartut arlaqartut Københavnimi Kalaallit Illuanni ilinniartunut siunnersortimut ulluni kingullerni saaffiginnittarput. Saaffiginnissuteqartut ernummatigaat ilinniarnerup aallartinneraniit peqataasinnaannginnissartik. Taama paasissutissiivoq, Kalaallit Illuanni Københavnimiittumi ilinniartunut siunnersorti, Pia Rosing Heilmann.
- Ilinniarfinni ingerlaqqiffiusuni tamani ilinniarnerup aallartinneraniit peqataanissaq pingaartorujussuuvoq, tassami ilinniarneq aallaqqaataaniit sakkortuumik aallartinneqartarmat, paasissutissallu pingaarutillit tunniunneqartarlutik. Ilinniartunut pineqartunut ajornerpaamik kinguneqassappat, imaaratarsinnaavoq fagini ataasiakkaani angusinngitsoortut, kinguaattoortut imaluunniit ilinniakkaminnik uteqqiisariaqalertut. Taamaattumik ilinniartut ernumapput, Pia Rosing Heilmann oqarpoq.
Kristian Mølgaard, Nuumminngaanneersoq, Norgemi isiginnaartitsinermik ilinniarluni januaarip 24-ani aallartittussaq, ernumavoq ullormi ilinniarfiup aallartinnerani peqataanngitsooratarnissaminut. Taassuma annilaanngatigaa piffissaq eqqorlugu ilinniarfissaminut apissinngikkuni ilinniarnerminut kinguneqarnerlussinnaanera.
- Aallaqqaataaniit peqataanissaq pingaartorujussuuvoq, taamaassanngippat ajoraluartumik allatut ajornartumik imaassinnaavoq atualinngiinnartunga, Kristian Mølgaard oqarpoq.
