Ilinniartut atugarissaarnerulernissartik utaqqisariaqarpaat

Kalaallit maani nunanilu allani ilinniagaqartut, ilinniartuunersiutitik qaffakkusuppaat. Ilinniartut aningaasaqarniarnermikkut artornartorsiortut, kalaallit Danmarkimi ilinniagaqartut kattuffiat Avalak isumaqarpoq. Tamannalu qinikkat iliuuseqarfigisariaqaraat isumaqarlutik.

Naak ilinniartut inuuniarnermikkut atugaasa misissuiffigineqarnissaat aamma misissuinerup inernerisa 2010-mi ukiakkut ataatsimiinnissaq sioqqullugu piareerneqarnissaat, Inatsisartut upernaaq ataatsimiinnerminni tamarmiullutik isumaqatigiissutigigaluaraat, maanna ukiakkut ataatsimiinnerup aallartinneranit ullut 14-it qaangiutereersut - suli takkuttoqanngilaq.

Tamannalu Niels Thomsenip Demokraatineersup uggoraa, taanna ima oqarpoq:

- Maannamut ileqqorineqartartuusorisara unaavoq, piffissamik sioqqutsilluni nalunaarutigineqartartoq qulequttat suut ataatsimiinnermi sammineqassamaarnersut, uanilu eqqartukkatsinni massakkumut taanna pisimanngilaq, Niels Thomsen oqarpoq.

Misissuinerup sumut killinnera paasisaqarfiginiarlugu, Niels Thomsen §36 najoqqutaralugu naalakkersuisunut ippassaani apeqquteqarpoq. Tamatumami qanittukkut oqaluuserineqarnissaa pingaaruteqartutut isigigamiuk:

- Piffissami matumani ilinniartitaaneq tamatta eqqartortuartillugu, sutigut tamatigut ineriartornissatsinnut qitiutillugu, taava taamaattumik qulequtaq uanga pingaarluinnartutut isigivara, Niels Thomsen Demokraatineersoq taama oqarpoq. Taassuma apeqquteqaatimi ullut qulit qaangiutsinnagit naalakkersuisunit akineqarnissaa qinnutigaa.