Inatsisartut ataatsimiinnertik ullumi ataatsiniit aallarteqqissavaat.
Qulequttat oqaluuserineqartussat arfineq-pingasuupput.
Siullertullu oqaluuserineqassaaq; ilinniartut angajoqqaaminni najugaqanngitsut ilinniagaqarnersiutinik assigiimmik annertussuseqartunik tamarmik pisalernissaannik siunnersuut.
Siunnersuummi ilaatigut tunngavilersuutigineqarpoq; angerlarsimaffiup avataani najugaqarluni ilinniagaqarnersiut qaffasinneq pissagaanni piumasaqaataammat februaarip aallaqqaataa sioqqulluguli namminerisamik ineqareersimanissaq aammalu inoqutigiinnik nammineq pilersitaqarsimanissaq. Tamatumalu saniatigut piumasaqaataallunissaaq nammineq meerarisamik najugaqartitsinissaq.
Taama aaqqiisimanerup kingunerigajuttagaa, siunnersuummi tikkuarneqarpoq, tassalu; illoqarfiup ilinniagaqartortai angajoqqaaminni najugaqaannarsinnaanngikkaangamik nalinginnarmik inissarsiortariaqartarnerat.
Aammattaaq ullormut oqaluuserineqartussat ilagaat, ernereernerup kingorna sulinngiffeqarnermi ullormusiaqartarneq, aammalu KNR-imi teknikkikkut piuminarsaaneq, kiisalu inersimasut tarnimikkut erloqissutillit angerlarsimaffissaannik pilersitsinissaq, allallu.