'Ilinniartut akulikinnerusumik taarsigassarsisinnaasariaqarput'

Atassutip kissaatigaa ukiup affaanut taarsigassarsiarisinnaasat 6000 koruuniusut qaammatikkaartungortinneqassasut. Siunnersuutip ilinniartut peqatigiiffiinik avissaartortsivoq, ilaasa tapersersorpaat ilaasalu akerlerlungu.

Ilinniartut peqatigiiffiisa, Danmarkimi Avalaap Nuummilu Kisap, Atassutip Inatsisartuni ukiaanerani ataatsimiinnissaannut siunnersuutaa tikilluaqquaat. Peqatigiiffiit isumaqarput qangalili taarsigassarsisarnermut inatsit iluarsartuunneqarsimasussaagaluartoq.

- Kalaallit ilinniartut qallunaanut Danmarkimi ilinniartunut naleqqiullungit taarsigassarsiarisinnaasaat annikippallaaqaat. Taarsigassarsiarisinnaasat qaammatikkaaleraluarunik ilinniartut aningaasartuutaannut iluaqutaassagaluarpoq, Atassut isumaqarpoq.

Qallunaaq Danmarkimi ilinniartoq kisimiittoq SU'p avataatigut qaammammut 2807 koruuninik taarsigassarsisinnaavoq taavalu kisimiilluni pilersuisoq 4212 koruuninik taarsigassarsisinnaalluni. Kalaallit ilinniartut taamatut periarfissaqanngillat.

Avalaap siulittaasuata Michael Rasmussenip siunnersuut tikilluaqquaa oqarlunilu:

- Piffissanngornikuuvoq qangarujussuarli ukiut tamaasa piffissaanikuuvoq nutarsarneqarnissaannut. Ilinniartut Kalaallit Nunaata siunissarippatigit annertunerusumik sammineqartariaqarput.

Kisap siulittaasua Mikael Nielsen isumaqarpoq ilinniartut atugaat pitsanngorsartariaqartut:

- Ilinniartut aningaasaqarnerat qanoq innersoq paasiniarlugu ukioq kingulleq misissuititsinikuuvugut, takusinnaasimavarpullu agguaqatigiisillungu assut amingartoortartut. Taarsigassarsisinnaanermut periarfissaat ajorluinnaramik, Michael Nielsen oqarpoq.

Ilinniagaqarnersiutit ukiuni qulini qaffanneqarnikuunngillat. Ukiup affakkaarluni taarsigassarsiarisinnaasat 6000 koruunit 2004-mi atortussanngortinneqarput kingornalu suli iluarsaanneqaqqigatik.

KIK'p siulittaasuata Hansigne Olsenip siunnersuut nuannarivallaanngilaa;

- Isumaqarpunga ukiup affakkaarlugit iluarnerujussuusoq tassami inuusuttut ilaat aningaasanik aqutsisinnaanngillat atornerluiinnassallutillu kingunerlussinnaallunilu, Hansigne Olsen oqarpoq erseqqissarlugulu manna nammineq inuttut isummerneralugu.

Taanna isumaqarpoq ilinniagaqarnersiutit qaffattariaqartut taarsigassarsiat pinnangit.

Avalak aamma Kisaq isumaqarput ilinniartut aningaasaqarnikkut atugaat Nunatsinni Danmarkimilu misissorneqartariaqartut.