Ilinniartunut aningaasaateqarfik nutaaq
Aningaasaateqarfimmik pilersitsisoq tassaavoq Nuna Fonden. Ivalo & Minik Fondenip siunertarai kalaallit qaffasinnerusumik nunani allani ilinniagaqarniartut tapiiffigisarnissaat. Ilinniakkap sivisussusaa qaffasissusaalu naleqquttuunersut aningaasaateqarfiup siulersuisuisa isummerfigisassavaat.
Aningaasaateqarfittaap siulersuisui Nuna Fondenimit, Kunngikkormiunit aamma Ilinniartitaanermut ilisimatusarnermullu naalakkersuisoqarfimmi toqqagaapput.
Aningaasaateqarfimmi siulittaasunngorpoq Minik Rosing siulittaasumut tulliulluni Michael Metz Mørk ilaasortallu sinneri tassaapput Palle Christiansen, Juliane Henningsen aamma Christian Schønau.
Aningaasaqarfik Nuna Fondenip Nuummi allaffeqarfianni inissisimavoq taassumalu nittartagassaa maanna suliarineqarpoq. Taanna piareerpat aningaasaateqarfiup siunertai aammalu ilinniakkat sorliit tapiiffigineqarsinnaanersut atuarneqarsinnaalissaapput taamatuttaarlu qinnuteqarnissamut immersugassat aaneqarsinnaassallutik.