Ilinniartunngortartut pisinnaasaat pitsaanerusariaqarput

Ilinniartunngortartut pisinnaasaat sulisitsisunit namminersortunit pitsaanerusariaqarsorineqarpoq. Kisitsisinnaaneq qallunaatoorsinnaanerlu naammanneq ajorput. Inuusuttorpassuit ilinniartunngornerminni inerissimanerat amigartartoq, uniinnartartullu amerlanerannut peqqutaaqataasoq, qalipaasoq namminersortoq oqarpoq.

-Ilinniartut suliaminnut tunniusimanerusinnaagaluarput, amerlasuummi inortuillutik suliartortarput, sullitatsinnullu suliap naammaginartumik inaarlugu tunniunnissaanut kinguaattuunnginnissamik, suliamillu ajunngitsumik suliarinninnissaannik ilinniartittarpavut, Ilulissani qalipaasoq namminersortoq Ingolf Skov oqaluttuarpoq. Qanittumi ilinniartumi ilaat sulisoriunnaarpaa. Aasianni atuartilluni inigisani nuannattoqartillugu sequtsersimammagu atuarfimmit ilinniartuuffimmillu soraarsinneqarpoq. Uggornaqaaq, Ingolf Skov oqarpoq.

Nangipporlu:

-Ukiup ilivitsup ingerlanerani angusat issariarnerinnarmi tamarmik annaaneqarput. Ilinniarfimmiitillunimi malittareqqusaasut malinneqartariaqarput. Paasinarpoq ilinniarfia taama qisuariaateqarmat. Ilinniartulli iliuutsimi kingunerisinnaasimasai ilisimasariaqarsimagaluarpai, Ingolf Skov, Ilulissanittaaq Sulisitsisut Peqatigiiffiata Grønlands Arbejdsgiverforeningip, immikkoortuani siulittaasoq ugguarpoq.

Sulisitsisullu ajornartorsiut nutaajunnginnerarpaat.

-GA-mi ilaasortatsinnit ilinniartut soraarsitaasarnerat takornartaannginnerarneqarpoq, qalipaasuinnaanngitsut assassorlunili namminersortut ilinniartorilertakkamik inerisimassutsimikkut amigaateqartarnerat nalunaarutigisarmassuk. Ilinniarnissaminnut piareersimareertaraluarpata tungitsinnit isumagisassavut naammassisassagaluarpavut.

Nunatta Naatsorsueqqissaartarfiata nalunaarutai tunngavigalugit ilinniartunngortartut affaat ukiut tamaasa taamaatittartut, Kalaallit Nunaanni Sulisitsisut Peqatigiiffiat erseqqissaavoq.