Ilinniartunngornissamut kissaatigisaq pinngitsoorsinnaavaa

Gunilla Evaldsen Royal Arctic Line-p qullersaqarfiani ukiuni pingasuni sulivoq. Sulinerminut atatillugu ineqartinneqarpoq.

Gunilla Ilisimatusarfimmi Oqaasilerineq, atuakkialerineq aamma tusagassiuutilerinermillu ilinnialernissaminut 1. september aallartittussami akuerisaavoq.

Ilinniagaqaq taanna ilinniarniaraanni piffissaq tamakkiisoq atorlugu ilinniagassaammat, Gunilla-p Royal Arctic Line-mi sulinini unitsittariaqarpaa, sulinerminullu atatillugu inigisani qimattariaqassallugu.

Gunilla ilinniagaqartut ineqarfiini inissaqanngilaq, taakkunani inissinniaraanni sivisuumik utaqqisariaqarpoq. Gunilla Evaldsen meeqqamik sisamanik ukiulimmik paarsaqarpoq, meeraq ajunngitsumik peroriartussappat inissiamik ajunngitsumik pisariaqartitsipput.  

- Amerlasuut ilinniakkamik aallartitserusuttarput, inissamilli amigaateqarneq pissutigalugu ilinniakkamik aallartitsinngitsoortarput, Gunilla Evaldsen oqarpoq.

Gunilla Evaldsen Service Økonom-itut Aalborg Universitet-imi ilinniagaqarpoq. Inuttut pisinnaasani annertusarusuppaa, tamannalu pingaartillugu.

Ilinnialernissaminut kissaatigisami piviusunngortinnissaa maannaakkut ajornakusoorpoq. Suliffini qimakkuniuk inigisani annaasaavaa.

Meqqamik sisamanik ukiulimmi paarisaqarpoq marluullutillu ajunngitsumik ineqarnissartik pisariaqartillugu.

Nunarput qimallugu  Danmark-imi nunaniluunniit allani ilinnialernissanik eqqarsaatigisimavaa, meeqqalli paarisami ilaqutai qimallugit aallarusunngillat.

Service Økonom-itut Aalborg Universitet-imi ilinniartuunermini ilinniagaqartut inissaqartinneqarnerat ajornannginnerusoq nalunngilaa.

Taamaattumik nunatsinni aallarnissaq Gunillap kissatiginngilaa.

Gunilla Evaldsen inissinik namminersortut pigisaannik attartornissaminik eqqarsaateqarpoq, taakkuali ilinniagaqarnersiutit pisartagarilerunigit akisuallaassapput.

Aningaasanik amerlasuunik sipaagaqartariaqarpoq, inissiamik pisiniaraanni, Gunilla Evaldsen oqarpoq.