Ilinniartorpassuit ullumi allagartartaarput

decembarip 17-at 2004 17:11

Ilinniakkani assigiinngitsuni soraarummeernerit allagartartaartitsinerillu ukiup naajartulernerani ingerlanneqaleruttorput. Ilinniarfinnilu assigiinngitsuni pingasuni ilinniarlutik naammassissunik nunarput ulluni kingullerni aamma pisuunnguallatsinneqarpoq, Tusagassiornermik ilinniartut marluk, perorsaasutut ilinniartut 17-it inunnillu isumaginninnermi siunnersortitut ilinniartut sisamat naammassimmata. Inunnik isumaginninnermi siunnersortinngortut Nuummi ullaap tungaani allagartartaartinneqarmata radioaviisi najuuppoq.

Tina Silassen aamma Naja Petersen inunnik isumaginninermut siunnertinngortunut ilaapput. Tina Silassen Nuummi Innerulaani siunnertitut atorfininnissamut qinnuteqarsimavoq, sulili allakkatigut akissutisimanani.

- Oqarfigineqarpungali akuerisaassamaartunga, Tina Silassen nuannaaqisoq oqarpoq.

Naja Petersen Aasiaat kommuneani isumaginninnermut siunnersortitut januaarip aallaqqaataanit atorfinippoq.

- Misigisimavunga sulinissannut piareersimallunga, Naja Petersen aamma tulluusimaaqisoq oqarpoq. Naammassisut marluk tamarmik isumaqarput isumaginninnermut siunnersortit nunatsinni annertuumik atorfissaqartinneqartut, massakkut meeqqat inuusuttuaqqallu sumiginnagaasut amerlassusaat eqqarsaatigalugit.

Niuernermi iliniarfimmi Nuummiittumi IT-mik aqutsisutut ilinniartut 15-it ilinniarnerminnik nammassinnillutik ullumi aamma allagartartaarput.