Ilinniartoqarneq aporfissalik

Kristian Kilime, qalipaasoq namminersortoq oqarpoq:-Isumaqarpunga ilinniartoqarnerusariaqartut, Nuummi sanaartornermi suliaqartut ilinniartukippallaaqaat.

Kalaallit Nunaanni sanaartornermi suliassat nallerneqarani anginersaat, tassa Maniitsup qeqertaani aluminiumik aatsitsivissap suliarineqarnissaa allamiunik suliarineqartariaqartoq Sulisitsisunit isummerfigineqarpoq. Taamaakkaluartorli tikisitsinissamut ikilisaassutaasinnaasut, tassa nammineq ilinniarsimasunik ilinniartitsisinnaaneq aporfeqarpoq.

Sanaartornermik Ilinniarfimmiit saqqumiunneqarpoq siorna sanasunngorniat, qalipaasunngorniat ruujorilerisunngorniallu 185-it ilinniartorineqalersinnaagaluartut, kisiannili ilinniartuuffissaqarnermik piumasaqaatit patsisigalugit 65-it taamaallaat ilinniartunngortut.

Saviminilerinermik Ilinniarfimmit ilisimatinneqarpugut 458-it ilinniartorineqarsinnaasut kisiannili taamaallaat 99-it ilinniartorineqalersut.

Tassunga tunngatillugu Sulisitsisuni siunnersorti Karsten Klausen nassuiaavoq:

-Ilaasortatta akornanni sulisut ilinniarsimasut marluugaangata taava ilinniartumik ataatsimik ilinniartoqartarput, tassalu uani pineqarput saviminilerinermi sanaartornermilu.

Nuummi inissaaleqineq ilinniartunillu inissaqartitsiniarneq aporfiusut ilagaat, tassunga tunngatillugu Karsten Klausen nassuiaavoq:-Nuummi ilinniartunngorniarlutik qinnuteqartut, ilinniarfissarsisarput, suliffeqarfiilli sinerissaminngaanniit ilinniartussarsiortartut taamatut iliuuseqarsinnaanngillat ilinniartut inissiaataasa amigaataanerat patsisigalugu. Saviminilerinermi soorlu ruujorilerisutut ilinniarnermi, qinnuteqartut ikittuararsuusarput, qinnuteqartoqarneq ajungajattarpoq, nalunngilara suliffeqarfiit ilinniartoqarusuttut, taamaattumik amerlanerusunik ilinniartoqarsinnaagaluarpoq, kisianni ilinniartut inissiaataanik neqerooruteqartoqarsinnaasariaqarpoq, qinnuteqaateqartoqartarlunilu, tassa suliffeqarfiit pisariaqartitaani.

Karsten Klausen-ip erseqqissarpaa biililerisunngorniartut amerlasaqimmata taakkununnga ilinniarfissanik naamattunik pissarsisoqarsinnaanngivimmat.