Ilinniartitsisut sulinngitsuukulanertik nassuiarpaat
Ilinniartitsisut sulinngitsuukulanerat pissutaalluni taartaagattartunut aningaasaliissutit Nuup illoqarfianut atugassiissutit nungulerput. Napparsimakulasoqarnera ilinniartitsisut nassuerutigaat nassuiaammillu saqqummiussaqarlutik.
- Aqutsinerlunneq, misilittagakinneq kiisalu immikkoortumi aqutsisut qullersarisaminnut ulluinnarni ilinniartitsisut nuanniilliuutaannik apuussisannginnerat suliffimmi silaannaap nuanniilliartuinnarneranik pissuteqarnerusarpoq, Birthe Therkildsen oqarpoq.
Immikkoortumi aqutsisut pingasuusut ilinniartitsisoqatigiit immikkoortuini nukarlerni, akullerni angajullernilu aqutsisutut inissisimasarput. Taakkuullutillu ilinniartitsisoqatigiinniit pisortap tungaanut uparuagassaqartillugu apuussisartussat, ulluinnarnilu atuarfiup ingerlanneqarnerani qanimut atuarfiup pisortaanut suleqataasussat.
Immikkoortumi aqutsisut misilittakkatigut amigartumik ingerlatsisarnerat pissutaanerulluni, atuarfimmi sulliviup silaannaa nuannerunnaartartoq Birthe Therkildsennip oqaatigaa.
- Aqutsinerluttoqartillugu suliffimmi silaannaq nuanniilligaangat, naluneqanngilaq napparsimasut amerlisartut, Birthe Therkildsen oqarpoq.
Immikkoortortami aqutsisut pikkorissartinneqarnissaat Birthe Therkildsenip ukiuni arlaqalersuni piumasariuarsimavaa, taamaasilluni ulluinnarni atuarfinni ajornartorsiutaasartut ajunnginnersumik qaangiivingineqarsinnaassagaluarmata.
- Kommuneqarfik Sermersuumiit akissaqannginneq aporfigineqartuaannartarpoq, nalunngilara immikkoortumi aqutsisut pikkorissartinneqartartut. Eqqaamanngilarali qanga kingullermik pikkorissartinneqarsimanersut, Nuussuup Atuarfiani 2007-imi sulilerpunga. Sulileramali pikkorissartitsisoqarnikuunngilaq, Birthe Therkildsen oqarpoq.
Ajornartorsiutit aaqqiiviginiarlugit immikkoortortami pisortat ajornartorsiutinik qaangiiniarnermi pikkorinnerusuugalaluarpata, Birthe Therkildsennip qularutiginngilaa meeqqat atuarfiini ilinniartitsisut napparsimakulavallaarunnaassagaluartut. Taannaannaanngilarli.
Ilinniartitsisut sulinngitsuukulanerannut, atuartitsinissamut tullermut piareersarluarsimannginneq pissutaaqataasarsinnaasoq, Nuuni Lynge Kangillinnguit Atuarfiani sulisut sinniisigisaat oqarpoq. Erseqqissaatigaluguli patsisiliutissallugu taanna kisiat ingasappallaassasoq.
Ilinniartitsisut sulinngitsoortarnerinut immikkoortortami aqutsisut misilittagakinnerat patsisiliutissallugu ingasappallaartoq, Hans Peter Broberg Kommuneqarfik Sermersuumi atuarfeqarfiup pisortaata oqaatigaa. Oqaatigaluguli suliffimmi pissutsinut aaqqissutaasinnaasunik sulissuteqaleruttorlutik.
- Ukioq manna immikkoortortanut aqutsisunut pikkorissaanissat pilersaarutaanngillat, aappaaguli pikkorissasrtitsisoqarnissaa naatsorsuutigaarput, Hans Peter Broberg oqarpoq.
