Ilinniartitsisut pisortallu aaqqiagiinngissuteqarnerat qaangiuppoq

Ilinniartitsisut atuartitsinerminni piffissaq atortagaat pillugu isumaqatigiissutissaq, isumaqatiginninniarnerni apeqqutini pingaarnersaavoq. Ukiup atuartitsiviusussap tulliuttup aallartinneraniit ilinniartitsisut sapaatip akunneranut akunnerni marlunni atuartitsinerusalernissaat isumaqatigiissutigineqarpoq. Kattuffinnut allanut neqeroorutigineqartut allat saniatigut ilinniartitsisut akissarsiaat 2,55 procentimik immikkut qaffaavigineqassapput.

Tamatuma saniatigut atuartitsisarnissat piffissaqarfigiumallugit ataatsimiittarnerit  ilaannut piffissaq atorneqartartussaq annertunerpaaffissalerneqarpoq. Ukiuni sisamani tulliuttuni akissarsiat qaffariaatissaat tamakkerlutik 7,35 procentiupput, tamatumalu saniatigut allanngortiterisoqarluni.

Isumaqatigiissutip kingunerisaanik atuartitsinerit ilinniartitsisunit ilinniarsimasunit ingerlanneqartalissapput.

IMAK-imi siulittaasoq, Sivso Dorph, isumaqatigiissut pillugu ima oqarpoq:

- Nuannaarutigeqaara maanna angusaqartoqarmat, neriuutigaaralu taama sivisutigisumik isumaqatiginniarnerit siunissami misigeqqissanagit. IMAK-imi siulersuisut ilaasortatik kaammattorpaat angusaasut akuereqqullugit.

Aningaasaqarnermut Naalakkersuisup Maliina Abelsenip kiisami isumaqatigiissuteqartoqarnera iluarisimaarpaa, atuartut taamaalillutik piumasaasut naapertorlugit atuartinneqarsinnaalermata.

- Akissarsiat qaffariaataat neriuutigisatsinnit annerulaarput, piffissalli sulliviusartup siunertaqarnerusumik ingerlanneqartalerneratigut ilinniartitsisut pissarsiaqarnerunerat naleqqutiinnarpoq. Ilinniartitsisut piffissat atuartitsiviusartut amerlineqarnissaanut peqataarusunnermikkut inuiaqatigiinnut pisussaaffimminnik ajunngitsumik takutitsipput akisussaassuseqarnerminnillu takutitsillutik.

KANUKOKA-p siulittaasuata, Martha Abelsenip kommunit ilinniartitsisunik atorfinitsitseqqissinnaalermata aamma nuannaarutigaa.

- Taamaalilluta ukiup atuartitsiviusussap tulliuttup piviusumik piareersarnissaa aallartissinnaalerparput. Tamatuma kinguneranik meeqqat atuarfiat pitsaanerusoq pilersinneqassaaq, kommunit kattuffiata siulittaasua oqarpoq.