Ilinniartitsisut pilersaarusiorniarneq ajornartorsiutigaat

Ilinniartitsisut sulinissamik piffissarititaasut pillugit isumaqatigiissutaat nutaaq atuarfiit affaasa missaanniittut ajornartorsiutigaat.

Isumaqatigiissut siorna aggustip aallaqqaataanit atulerpoq, taannalu malillugu skemat allanngorartut atuarfinni atorneqalerput, ilinniartitsisut aalajangersimasut pikkorissaraluarpataluunnit meeqqat atuartinneqarnissaat qulakkeerniarlugu.

Misilittakkalli siulliit pitsaavallaanngitsut, ilinniartitsisut kattuffianni IMAK-imi siulittaasoq Sivso Dorph oqarpoq.

- Atuarfiit amerlanersaat ajornartorsiuteqarsimapput, pilersaarusiorluarsinnaasimanngillat, taamatuttaaq ilinniartitsisut peqanngiffissaat pilersaarusiorsinnaasimanagit. Sivso Dorph erseqqissaavoq.

Qarasaasiami programmi nuna tamakkerlugu atulereersoq siulittaasup neriuuteqarfiginerarpaa, taanna atuarfinnik ingerlatsisut pilersaarusiornerannik oqilisaassissammat. Atuarfiit maannamut pappialat aqerluusallu atorlugit pilersaarusiorniartarsimapput, tamannali iluatsippallaarsimanani.