Ilinniartitsisut nutaat 19-it ullumi allagartartaarput

Meeqqat sumiginnakkat eqqartorneqartillugit ilinniartitsisunngortut imaannaanngitsumik suliassaqarput, piareersimallutilli misigisimapput.

Tulla Thorsen Qaqortuminngaaneersoq inunnik isumaginninnermi siunnersortitut sulereerluni ilinniartitsisunngornissani soqutigilersimavaa, meeqqanillu sullissinissaminut piareersimalluni misigisimavoq.

-Meeqqat toqqaannanngikkaluarlugit inunnik isumaginnittoqarfik aqqutigalugu meeqqanik sullissisarnikuuvunga, massakkullu tikillugit samminerulertussaavakka. Misigisimavunga sunaluunniit iserfigisinnaallugu. Naqqaninngaanniit aallartittussaagatta nangianngilanga aamma soqutigivara, Tulla Thorsen oqarpoq.

Tulla Thorsen-ip inuttut tunniussassaqarluarluni misigisimavoq.

-Inuttut nammineerlunga sulerusussera, suliassanut soqutiginninnera, tunniusimanera, piffissamik ataqqinninera, nutaanullu takkuttunut tigusisinnaanera meeqqanik sullississallunga nukittoqutigivara, Tulla Thorsen oqarpoq.

Bjarne Nielsen Maniitsuminngaaneersoq meeqqanik sullisserusulluni ilinniartitsisunngorusussimavoq ilinniartitsisunillu amigaateqarneq peqqutigalugu. Meeqqanillu sullissinissaminik sakkussaqarluarluni misigisimavoq.

-Ilinniakkatsinnut ilinniarnikuuarput anguniarnikuullugulu meeqqat sumiginnakkat sullisissallugit, taamaammallu piareersarnikuuvugut angusiffigereernikuullugillu specialundervisning-imi, taamaammallu misigisimavunga meeqqat sumiginnakkat sullisissallugit

Bjarne Nielsen-ip meeqqanut ajunnginnerpaaq angorusuppaa, meeqqallu siunissami ajunngitsuunissaat aamma angorusullugu. Meeqqat toqqissisimasumik peroriartornissaat ilikkagaqarsinnaanissaallu aamma anguniartussaallugu oqarpoq, nukissaqaqalunilu misigisimavoq.

Tulla Thorsen Nuummi ilinniartitsisutut atorfinereerpoq, Bjarne Nielsen-ilu Maniitsumi ilinniaritsisunngussalluni.

Nunarput tamakkerlugu ilinniartitsisut 445-it amigaataapput.