Ilinniartitsisut nunaqarfiliarumanngillat

Nunatsinni nunaqarfinni ilinniartitsitisussaaleqiffioqaaq. Illoqarfinni ilinniartitsisut 70 procentii ilinniarsimasuupput, nunaqarfinnili ilinniartitsisuusut 43 procentii taamaallaat ilinniarsimasuullutik.

Ukiuni aqqaneq marlunni nunaqarfinni ilinniartitsisuusimasoq maannalu Narsami ilinniartitsisuusoq Niels Egede oqarpoq, inuttut suliffiullu iluani ineriartorneq pisariaqarmat illoqarfimmut nuussimalluni:

- Ukiorpassuit nunaqarfinniikkaanni pikkorissartarnerit assigiinngitsut pisariaqalersarput, aammalumi suleqatit pikkorissut aamma amigaataasarlutik, Niels Egede oqarpoq.

Niels Egede oqarpoq nunaqarfinni aamma ilinniartitsisutut sulilluni assigiinngitsutigut piginnaasallit soorlu tarnip pissusaanik ilimasallit aamma pisariaqartinneqalersartut.

Nunaqarfippassuarni meeqqat ukiorpassuarni ilinniarsismasunik atuartinneqarsimanngillat, nunaqarfiillu ilarpassuini atuartut ikiliartuinnarlutik.

Niels Egede isumaqarpoq nunaqarfiiit ineriartunnginnerat ilinniartitsisut nunaqarfinnut nuukkusuttannginnerannut peqqutaaqataasoq:

- Atugassarititaasut, soorlu ineqarnikkut imeqarniarnerulllu tungaatigut pisutsit nunaqarfinni pitsaanngillat, illoqarfinnilu siuariartornerit soorlu teknikikkikkut tunngasuni nunaqarfinni ineriartortinneqanngillat. Aamma atuarfinni atortorissaarutitigut pigisaqannginneq angallannikkullumi pissutsit pitsaannginneri ilinniartitsisut nunaqarfinnut nuunnissaminnut tunuarsimaartarnerannutpeqqutaaqataasoraakka, Niels Egede oqarpoq.

Niels Egede isumaqarpoq meeqqat ilinniarsimasunik atuartinneqanngittarnerisa kingunerigaa nunaqarfimmiut illoqarfimmiunut naleqqiullutik ilisimasatigut nallersuunneqarsinnaanngimmata tamannalu nunaqarfiup ineriartorneranut tuttussaasoq.