Ilinniartitsisut misissuivigineqaqqupput
Atuarfinni atuartut ilinniartitsisullu atuariartunngitsoortarneri misissuiviginiarneqartariaqalerput, suliartunngitsoorneq suliamik peqquteqarnersoq aperisoqarneq ajorpoq, aamma ilinniartitsisut suliartik oqimaappallaarsorineraat apeqqutigineqarneq ajorpoq.
Taama isumaqarpoq, Ilinniartitsisut Meeqqat Atuarfiineersut Kattuffiat, IMAK. ilinniartitsisut suliartunngitsoortarnerujussuat pillugu saaffigineqartarnertik IMAK-ip qatsulluinnarpaa.
Ilinniartitsisut sooq suliartortannginnerannik isuma pigiliutiinnagaq ajugaaffigiumallugu
IMAK sukumiisumik misissuititsinialerpoq, meeqqat atuarfiini ilinniartitsisut timikkut tarnikkullu atugaat misissuivigissallugit.
- Meeqqat atuarfianni aqutsisut ilinniartitsisullu sulinerminni sianiutimikkut tatineqarnerat angereeqaaq, ukiunilu kingullerni suli alliartorluni, allanngortiterinerit, meeqqat inuusuttullu sumiginnakkat amerlaiartornerat, namminerlu atugarisanut sunniuteqarnissamut periarfissannginneq ilaatigut peqqutigalugit, IMAK tusagassiutinut taama allappoq.
Taanna kajumissaarut inatsisartuni ilaasortap Palle Christiansenip siunnersuutitut marlunngorpat saqqummiunniagaa tunngavigalugu kajumissaarutaavoq, siunnersuutigimmagu Naalakkersuisut peqquneqassasut ilinniartitsisut suliartortannginnerat meeqqallu atuariartunngitsoortarnerat tamanut saqqummiunneqassasoq.
- Suliartunngitsoortarnermut peqqutaasartut misissornissaannut annikillisarneqarnissaannullu kattulluta nukivut atortigik, tassami Kalaalilit Nunaanni meeqqat atuarfiat pitsaasoq inatsisiliornerinnakkut pilersinneqarsinnaanngilaq, IMAK-ip siulittaasua, Sivso Dorph, oqarpoq.
