Ilinniartitsisut isumaqatigiissutissamik aamma utaqqipput
Ilinniagartuut 600-it ukiup affanngortumi suli isumaqatigiissuteqanngitsut ullup qeqqanut Radioavisimi oqaluttuaraarput. Kisianni amerlanipilussuit Namminersorlutik Oqartussanut isumaqatigiissusiornissamik utaqqipput.
Ilinniartitsisut Meeqqat Atuarfianniittut 1200-it isumaqatigiissutaat ukioq manna marsip naaneranut killeqartoq, aamma suli nutaamik taarserneqanngilaq.
Ilinniagartuut marsimi isumaqatigiinniariartoraluaramik naalakkisaartinneqarsimallutik novembarip arfineq pingajuani isumaqatigiinniariartoqqissapput. Kisianni Ilinniartitsisut isumaqatigiissummik killiffissaata ukiup affaa qaangereeraluaraa Namminersorlutik Oqartussanik naapitsisimanngillalluunniit.
- Isumaqatigiinniarnerit suli aallartinnikuunngillat. Taamatut inissisimasoqarnera uagutsinnt nuanniippoq naammaginnanngilluinnarlunilu, IMAK-ip siulittaasua, Sivso Dorph, taama oqarpoq.
Taanna oqarpoq, peqatigiiffimminnit Namminersorlutik Oqartussanik oqaloqateqarniarlutik iliuuuserisinnaasaminnik iliorsimagaluarlutik:
- Isumaqatigiinniarnerit qangali aallartinnissaa uagut kissaatigisimagaluarparput. Kisianni sooq suli aallartissimanngitsinnut Namminersorlutik Oqartussani isumaqatigiissutit pillugit Immikkoortortaqarfimmiit akissutisaqassapput.
IMAK-ip Namminersorlutik Oqartussanik tunngaviusumik isumaqatigiissutaa naapertorlugu, illua tungeriit arlaata kissaateqarneraniit kingusinnerpaamik qaammatit marluk qaangiuppata isumaqatigiinniarnerit aallartinneqartussaagaluarput. Sivso Dorph-illi suliumajunnaarnissamik tunngaviusumik isumaqatigiissutip periarfissiissutaa atorusunngilaa. Taamaaliorneq angusaqarfiussangatinngilaa.
Namminersorlutik Oqartussani Isumaqatigiissutit pillugit Immikkortortaqarfimmiit nassuerutigineqarpoq, isumaqatigiinniarnissanut suli ulluliisoqarsimanngimmat. Kisianni tassanngaanniit aamma neriorsuipput, isumaqatigiinniarnissanut piareersarlutik.
Utaqqisitsinerup sivitsornera nassuiarneqarpoq, isumaqatigiissuteqarfissaq inuppassuarnut tunngammat aamma sulisut peqatigiiffiannut allanut isumaqatigiinniarnerit ingerlanneqarsimammata.
Immikkoortortaqarfimmi siunnersorti André Guttesen isumaqatigiissusiornissamut qanoq iliuuseqarniarnersut, KNR-imiit aperigatsinni, akivoq, sapinngisaminnik iliorlutik. Apereqqikkatalu, iliusaat naammannersut, akivoq; "tamanna uanga akisinnaasussaanngilara". Taaamaaleriarluni oqarpoq, apersuineq naasoq.
André Guttesenip naalakkesuinikkut qullersaa, aningaasaqarnermut naalakkersuisoq, Palle Christiansen, isumaqatigiinniarnernut ingerlasutut taasaminut tunngasumik aamma oqaaseqarumanngilaq.
