Ilinniartitsisut isumaqatigiissutaat sipaarutaalersoq
Taamaattoqarneratalu iluaqutitaraa, atuarfiit ilinniartitsisunik amigaatillit aningaasanik sipaarsinnaanngornerat, taama oqarpoq Kommune Kujallermi atuartitaanermut paaqqinnermullu pisortaq, Jens Korneliussen.
- Ilinniartitsisut timenik taama amerlatigisunik atuartitsisalernissaasa kingunerissavaa, ilinniartitsisunik pisariaqartitsinerup annikinnerulernera. Pisariaqartitsinerulli qanoq annertuginera juunip qeqqata missaani aatsaat maanni Kujataani paasisinnaalissavarput, Jens Korneliussen oqarpoq.
Jens Korniliussenilli maannamut suli erseqqissumik oqaatigisinnaannginnerarpaa, akissarsiat isumaqatigiissutaasup nutaap atuutilernerani, Kujataani ilinniartitsisussaaleqiunnaamisoqassanersoq.
Jens Korneliussenilli naatsorsuutigilluinnarpaa, atuarfinnut annernut isumaqatigiissut nutaaq sunniuteqarluassasoq.
- Illoqarfimmi ataatsimi ilinniartitsisut taakkuusut atuartitsisarnisaat 2 time-nik ilappata, taava soorunalimi ilinniartitsisunik amerlanerusunik pisariaqartitsinerput annikillissaaq. Kisiannili nunaqarfinni mikisunik atuarfilinni ikittuarannguanillu ilinniartitsisoqarfiusuni tamanna malunnaataagaarnavianngilaq, imatummi kinguneqarnaviannginnami ilinniartitsisunik pisariaqartitsinerput nunaqarfinni annikillissasoq, Kommune Kujallermi atuartitaanermut paaqqinnermullu pisortaq, Jens Korneliussen oqarpoq.
Qaasuitsup Kommuneani atuartitaanermut pisortap, Hans Eriksenip oqaatigaa, ilinniartitsisut akissarsiaasa isumaqatigiinniutigineqarnerata inernera kommunemut sipaarutaasinnaasoq, maannamulli oqaatigisinnaanagu qanoq sipaarutaatigissanersoq. Qeqqata Kommunea aamma taamatorluinnaq KNR-imut oqarpoq.
