Ilinniartitsisut inissaqartinneqanngitsut

Upernaviup nunaqarfiisa avannarlersaani Kullorsuarmi ilinniartitsisut illussaqartinniarnerat nalorninartorsiorfiuvoq.

Nammineerluni illuliassat marluk Illorput 2000 type 4-at atortussaat kommunimit pisiarineqareersimapput, taakku Kullorsuarmut tikiunneqareerput.

-Teknikkikkut ingerlatsiveqarfik apeqquteqarfigigatsigu qaqugu kikkunnillu sananeqalissanersut akineqarpugut, illut ukioq manna sananeqassanngitsut, Kullorsuarmi atuarfiup pisortaa Svend Nielsen radioaviisimut oqarpoq.

Illunik sanasoqarnissaa neriorsuutigineqarmat soorunami ilinniartitsisoq nutaaq taavunga tikippoq. Maannakkulli ajornartorsiuteqartoqalerpoq.

Nunaqarfinni ilinniartitsisut illussaqarniarnerat ataatsimut isigalugu ajunngitsoq atuarfimmi pisortaaneq Hans Christian Hjort radioaviisimut oqarpoq. Aappilattumili nutaamik pisariaqartitsisoqarluni, ilaanni atorfinittartut naapertorlugit malinnaasoqarluni.

Ilinniartitsisut illutaartinniarnissaat qanoq ajornanngittartiginersoq apeqqutigineqarmat akivoq, allaffissornikkut ingerlatsisut marluusut aappaa INI kiisalu kommunip inissaqarnermut allaffia. Ilaatigullu tamanna ajornaatsuinnaaneq ajortoq,

Upernavimmi atuarfimmi pisortaaneq Hans Christian Hjort radioaviisimut oqarpoq.

Atuarfik nammineerluni ilinniartitsisunut Upernavimmi inissaateqanngilaq, kollegiami inissaritinneqartut kisiiisa eqqaassaanngikkaanni.

Kommuneqarfik Upernavimmit oqaaseqartitsiniaraluaratta iluatsinngilarput.