Nunatsinni ilinniartitsisut kattuffiat, IMAK, aamma Naalakkersuisut ilinniartitsisut akissaataannik ukiunut tulliuttut sisamanut isumaqatigiissuteqarput.
IMAK aningaasaqarnermullu Pisortaqarfik sapaatiummat novembarip ulluisa 19-ianni isumaqatigiillutik atsioqatigiipput. Ilinniartitsisut atuartitsisullu 1437-iusut akissarsiaasa 8,5 procentimik qaffanneqarnissaat isumaqatigiissutigineqarpoq. Sumiiffinni ataasiakkaani aningaasat illikartinneqartut isumaqatigiinniutigineqartussaapput.
Oqaatigineqarporlu IMAK-ip Naalakkersuisullu isumaqatigiinniarneri aatsaat taama akerleriissuteqarfiunatik isumaqatigiissuteqarfiusut.
Isumaqatigiissut nutaaq naapertorlugu, ilinniartitsisut atuartitsisullu ilinniaqqissimanerat pikkorissarsimaneralluunniit, aningaasarsiat qaavatigut immikkut tapisiaqaataasinnaalerput.
Isumaqatigiissutigineqartoq, naammagisimaarluarneqartorlu, IMAK-ip ilaasortaanit, Naalakkersuisunit, KANUKOKA-millu akuersissutigineqareeruni atuutilissaaq.