Ilinniartitsisut 275-t isumasioqatigiissinneqartut
Sammisat atuarfimmut tunngasut pillugit pikkorissaanerit oqalugiarnerillu arlallit sisamanngornermi tallimanngornermilu ingerlanneqarput. Kommuneqarfik Sermersuumi atuarfinnik inerisaasut isumasioqatigiissitsinissamut aggersaasuupput, katersuutsitsinermilu sammineqartut siammasissupilussuullutik.
-Isumasioqatigiissitsinissamut assigiinngitsorpassuarnik sammisaqartitsiniarluta toqqarsimavarput. Meeqqat atuarfiat pillugit inatsit nutaaq, cooperativ learning, sociokulturel teori aamma ADHD ilaatigut pillugit pikkorissaasoqarpoq. Ilinniartitsisuvut sapinngisamik pitsaanerpaamik piareersarneqarnissaat taamaalilluta anguniarparput, Birthe Therkildsen, ilinniartitsisunik isumasioqatigiissitsinermi aaqqissueqataasoq taama oqaluttuarpoq.
Ilinniartitsisutut sulineq ukiuni kingullerni allanngorsimaqaaq, ilinniartitsisullu siornatigornit annerusumik ullumik piumasaqarfigineqarput. Taamaammat aamma ilinniartitsisut ukiup atuarfiup nutaap aallartinnginnerani piareersarluarneqarnissaat pisariaqarpoq.
-Ilinniartitsinermut tunngasut saniatigut aamma allat pillugit ilisimasassanik nutaanik pisariaqartitsineq annertusiartuinnarpoq. Ilinniartitsisorisatta atuartut ADHD-mik nappaateqartut qanoq sullinnissaannut sakkussanik pisariaqartitsipput. Ilinniartitsisunik isumasioqatigiissitsinitsigut. kommunip ilinniartitsisuisa ilinniartitsinikkut tunniuttagaasa pitsaassusaanik qaffassaaqqissinnaassalluta neriuutigaarput, Birthe Therkildsen knr.gl oqarpoq.
